Ўрта вазн тоифасида UFC жангчиси Ҳамзат Чимаев ўтган ҳафтада рекорд ўрнатганига қарамай промоушен янгиланган рейтингидан жой олмади.
Вазнидан қатъи назар энг кучли жангчилар рўйхатида Тони Фергюсон икки поғона юқорилаб, 12-ўринга чиқиб олган бўлса, кучли учликда ўзгариш қайд этилмади. Аввалги рейтингларда бўлгани каби Жон Жонс, Ҳабиб Нурмагомедов ва Стипе Миочич кучли учликдан ўрин олган.
Енгил вазн тоифасидаги жангчилар рейтингида эса аввалроқ учинчи бор фаолиятини якунлашини эълон қилган Конор Макгрегор Ден Ҳукердан ортда қолиб, бешинчи ўринга тушиб кетган. Шунингдек, ярим ўрта вазн тоифасида Колби Ковингтон Гильберт Бёрнсдан илгарилаб, биринчи ўринга кўтарилган.
Қайд этиш жоиз, 26 ёшли Чимаев 32 ёшли Мершертни 17 сония ичида нокаутга учратиб, тезкор нокаутлар борасида UFC тарихида (ўрта вазн тоифасидаги) учинчи энг яхши натижани қайд этди. Фақат Марк Вейр (10 сония) ва Терри Мартин (14 сония) рақибларини ундан тезроқ нокаутга учратган.
Ҳамзат 16 июль куни UFC on ESPN 13 мусобақасида промоушендаги дебютини ўтказган. Унда швециялик спортчи Жонс Филлипсни оғритиш усули билан таслим этди. Шунингдек, UFC Fight Island 3 мусобақасида Ҳамзат Рис Маккини 3 дақиқа ичида нокаутга учратганди.
Ҳамзат Чимаев иштирокидаги жангларни бу ерда кўриш мумкин → ҳавола.
Изоҳ (0)