Лондонда дунёда илк бор COVID-19 вакцинаси самарадорлигини синаш учун кўнгиллиларга касаллик келтириб чиқарадиган SARS-CoV-2 вируси юқтириладиган тажриба ўтказилади. Бу ҳақда Financial Times’га таяниб, «РБК» хабар берди.
Қайд этилишича, тажриба январь ойида бошланади, бу ҳақда эса кейинги ҳафтада расман эълон қилинади. Ташкилотчилар ушбу тажриба 2021 йилда клиник синовлари бошланадиган COVID-19 вакциналарининг энг истиқболлиларини танлаб олиш имконини беришига умид қилмоқда.
Кўнгиллиларга дастлаб вакцина инъекцияси юборилади (айнан қандай препарат эканлигига аниқлик киритилмаган), орадан бир ой ўтиб эса касаллик келтириб чиқарадиган дозада SARS-CоV-2 юборилади.
Буюк Британияда қарийб икки минг нафар, дунё бўйича эса 37 мингдан ортиқ кўнгиллилар ушбу тажрибада иштирок этиш истагини билдирган.
Лойиҳанинг илмий томонига Лондон Империя коллежи ва Британиянинг hVIVO компанияси раҳбарлик қилади. Синовлар ўтказиш жойи тўғрисидаги қарор ҳали қабул қилинмаган, катта эҳтимол билан Лондоннинг Уайтчепел мавзесидаги ихтисослашган шифохонада ўтказилиши мумкин.
Қайд этилишича, бундай тажриба вакцина ишлаб чиқишда қўл келиши мумкин, лекин энг муҳими унда иштирок этувчиларнинг хавфсизлиги ҳисобланади.
Financial Times’нинг ёзишича, hVIVO томонидан ташкиллаштирилган гриппга қарши препарат тажрибасида қатнашган кўнгиллиларга 3,7 минг фунтгача (тахминан 4711 доллар) компенсация берилади. COVID-19 билан боғлиқ тажрибада эса компенсация миқдори катта эҳтимол билан ундан ҳам кўп бўлади.
Айни пайтда Буюк Британияда COVID-19 билан боғлиқ вазият баҳордаги кўрсаткичга қайтмоқда. Ҳукумат қишда вазият ундан ҳам оғирроқ бўлишидан огоҳлантирган. Бош вазир Борис Жонсон мамлакатда қайта карантин жорий этилиши мумкинлигини маълум қилган.
Изоҳ (0)