Жанубий Корея Денгиз ва қишлоқ хўжалиги вазирлиги ходими КХДРнинг территориал сувларида қасддан ўлдирилган. Бу ҳақда Yonhap агентлигига таяниб, Meduza хабар берди.
Жанубий Корея Мудофаа вазирлиги Пхеньян томонидан амалга оширилган бу каби «шафқатсизлик акти» бўйича тушунтириш сўраган ва айбдорлар жазоланишини талаб қилган.
Сеулнинг маълумотларига кўра, 47 ёшли амалдор 21 сентябрь куни Ёнпхёндо ороли яқинида инспекция ўтказаётган катер бортидан йўқолиб қолган. Тахминларга кўра, у КХДРга қочишга уриниб, мамлакат территориал сувлар орқали сузиб кетган. 22 сентябрь куни кечаси Шимолий Корея патрули уни пайқаб қолиб, отиб ташлаган. Шундан сўнг олий қўмондонлик буйруғи билан марҳум танаси оролда ёқиб юборилган.
Сеулнинг ҳисоблашича, КХДР ҳукумати бу каби ғайриинсоний ҳаракатни коронавирус тарқалишига қарши кураш бўйича ўзларнинг қўлланмаси доирасида амалга оширган бўлиши мумкин.
Расмий Пхеньян мазкур ҳолатга ҳозирча ҳеч қандай изоҳ бермаган.
Эслатиб ўтамиз, август ўрталарида КХДР ҳукумати Жанубий Корея билан чегарада жойлашган Кэсон шаҳрида жорий этилган қаттиқ карантин режимини бекор қилиш бўйича қарор қабул қилганди. 26 июль куни КХДР ҳукумати Жанубий Кореядан чегарани ноқонуний кесиб ўтган фуқарода коронавирус касаллигининг белгилари кузатилганини маълум қилганди. Шу сабабли Кэсон шаҳрида 24 июлдан қаттиқ карантин режими жорий этилган эди.
Изоҳ (0)