Қозоғистон шимолида юқори патогенли парранда гриппи тарқалгани тўғрисида хабар берилганди. «Хабар 24» теледастурида маълум қилинишича, мамлакатнинг тўртта ҳудудида парранда гриппи тарқалаётгани расман тасдиқланган.
Маълумотларга кўра, ўлим шимолдан жанубга кўчиб юрадиган ёввойи қушларда бошланган. Инфекция умумий сув ҳавзалари орқали тарқалгани айтилмоқда. Фабрикаларда ва шахсий томорқаларда ҳаммаси бўлиб 54 минг парранда нобуд бўлган. Қозоғистон қишлоқ хўжалиги вазирлиги уларнинг эгаларига товон пули тўланиши, бунинг учун тахминан 390 миллион тенге (913 минг АҚШ доллари) ажратилиши ҳақида айтган.
Мамлакатнинг бешта минтақасидаги 47 та аҳоли пунктида қушларнинг оммавий қирилиши кузатилган. Парранда гриппи Ақмўла, Шимолий Қозоғистон, Павлодар ва Костанай вилоятларида расман тасдиқланган. Қарағанда вилоятида ҳам ушбу ҳолат кузатилмоқда.
Энг катта зарар Шимолий Қозоғистондаги паррандачилик фермаларига тўғри келган. У ерда 41 минг бош парранда нобуд бўлган. Ушбу минтақадаги 23 та аҳоли пунктида парранда гриппи расман тасдиқланган. Ҳозирда у ерда инфекция юқтирган паррандалар утилизация қилинмоқда.
Шунингдек, Қозоғистон қишлоқ хўжалиги вазирлигининг хабар беришича, 1,4 миллион вакцина ажратган ва ҳозирда улар деярли 5 миллион қуш учун юборилган. Бундан ташқари, яна бир миллион вакцина 3,5 миллион бош парранда учун жўнатилган. Ҳозирда Шимолий Қозоғистоннинг ўзида 79 киши бу ҳолат бўйича ишламоқда.
Аввалроқ Хитойда коронавирус эпимаркази яқинидаги ҳудудда парранда гриппи тарқалгани, Саудия Арабистони ва Вьетнамда юқори патогенли парранда гриппи аниқлангани тўғрисида хабар берилганди.
Изоҳ (0)