Ҳукумат қарори билан 2020 йил 21 сентябрь куни 2020–2022 йилларда Фарғона вилоятининг Тошлоқ туманини ижтимоий-иқтисодий ривожлантириш ва камбағалликни қисқартириш чора-тадбирлари дастури тасдиқланди.
Дастурни амалга оширишнинг устувор йўналишларидан бири камбағал хонадонларга субсидия ажратиш асосида енгил конструкцияли иссиқхоналар барпо этиш ва ҳунармандчилик йўналишида янги иш ўринларини яратиш ҳисобланади.
Дастурга кўра, туманни ижтимоий-иқтисодий ривожлантириш ва камбағалликни қисқартириш мақсадида жами 1 887 та лойиҳанинг амалга оширилиши назарда тутилган.
Жумладан, туманда саноат, хизмат кўрсатиш ва қишлоқ хўжалиги маҳсулотларини қайта ишлаш соҳаларини ривожлантириш бўйича 108 та инвестиция лойиҳаларининг амалга оширилиши ва бу орқали 2 424 та янги иш ўринларининг яратилиши белгиланган.
Бундан ташқари, Дастур доирасида белгиланган йилларда:
- тумандаги 802 та хонадонга енгил конструкцияли иссиқхоналар қуриш учун субсидиялар ажратилади;
- ҳунармандчилик йўналишида 832 та лойиҳани амалга ошириш орқали 1 971 та янги иш ўрни яратилади.
Ҳар бир маҳаллада деҳқончилик билан шуғулланиш истагини билдирган аҳоли рўйхати шакллантирилади.
Тошлоқ туманидаги Заркент агросаноат коллежи биносида тумандаги кооперацияга бириктириладиган камбағал оила аъзоларининг лимончилик соҳасидаги билим ва тажрибасини ошириш бўйича ўқув курслари ташкил этилади.
Шунингдек, Вазирлар Маҳкамаси қарори билан 2020–2022 йилларда Бухоро вилоятининг Олот туманини ижтимоий-иқтисодий ривожлантириш ва камбағалликни қисқартириш чора-тадбирлари дастури ҳам тасдиқланди.
Қарорга мувофиқ, тумандаги яшаш шароити оғир бўлган оилаларни уй-жой билан таъминлаш мақсадида Олот тумани ҳокимлигининг бўш турган ётоқхона биноси 60 та (34 та – 2 хонали, 26 та – 1 хонали) хонадонга мўлжалланган турар жойга мослаштириб реконструкция қилинади.
Туманда 2020 йилда 1 700 бош қорамолга мўлжалланган чорвачилик комплекси ташкил этилади.
Қарор билан тасдиқланган дастурга кўра, туманни ижтимоий-иқтисодий ривожлантириш ва камбағалликни қисқартириш мақсадида жами 155 та лойиҳанинг амалга оширилиши назарда тутилган.
Жумладан, туманда саноат, хизмат кўрсатиш ва қишлоқ хўжалиги соҳаларини ривожлантириш бўйича 71 та инвестиция лойиҳаларининг амалга оширилиши ва бу орқали 1 342 та янги иш ўринларининг яратилиши белгиланган.
Тумандаги 276 нафар ишсизлар тикувчилик, қишлоқ хўжалиги машина ва жиҳозларига техник хизмат кўрсатиш, ҳунармандчилик каби йўналишларда касб-ҳунарга ўқитилади.
Қарор билан, шунингдек, туманда камбағалликни қисқартириш юзасидан амалга ошириладиган чора-тадбирлар тасдиқланди.
Изоҳ (0)