Президент Қосим-Жўмарт Тўқаев Самарқандда Қозоғистон бош консулхонасини очиш тўғрисидаги фармонни имзолади. Бу ҳақда Оқ Ўрда матбуот хизматига таяниб, Tengrinews хабар берди.
Унда Самарқанд шаҳрида Қозоғистоннинг бош консулхонасини очиш, Қозоғистон ҳукуматига ушбу фармондан келиб чиқадиган зарур чораларни кўриш белгиланган. Фармон 23 сентябрь кун имзоланган бўлиб, эълон қилинган кундан кучга киради.
Маълумот учун, Ўзбекистон бош консулхонаси Қозоғистоннинг Ақтау шаҳрида жойлашган. У 2019 йилнинг 30 августида очилган. Ақтаудаги Бош консулхонанинг консуллик округига Қозоғистоннинг Ақтўбе, Атирау, Манғистау ва Ғарбий Қозоғистон вилоятлари киради. 2019 йил июнида Нодир Турғунов Ўзбекистоннинг Ақтаудаги бош консули этиб тайинланган.
«Нега энди Ақтау? Шаҳар Қорақалпоғистон ва Хоразмга қўшни бўлган ҳамда меҳнат муҳожирлари Россияга йўл олганда ўтадиган Манғистау вилоятининг маъмурий маркази. Ақтау Қозоғистоннинг тез ривожланаётган ҳудудлари қаторига киради. Энг муҳими, бу ерда Каспий денгизига олиб чиқадиган икки порт, ‘Шеврон’ каби кўплаб йирик хорижий компаниялар ваколатхоналари жойлашган», — деб изоҳлаганди Ўзбекистоннинг Қозоғистондаги элчиси Саидикром Ниёзхўжаев.
Изоҳ (0)