Тошкент шаҳри ҳокимлиги Транспорт вазирлиги ва Туркиянинг Калён Уластирма транспорт инжиниринг компанияси билан ҳамкорликда 22 сентябрдан бошлаб пойтахт транспорти ва йўл-транспорт инфратузилмасини ривожлантириш бўйича бош режани яратиш йўлида фуқаролар ўртасида сўровнома ўтказишни бошлади. Бу ҳақда Тошкент транспорт бошқармасига таяниб, «Gazeta.uz» хабар берди.
Транспорт бошқармаси, «Тошшаҳартрансхизмат» компанияси ва бошқа тузилмалари ходимларининг 500 дан ортиқ волонтёрлари тўғридан-тўғри фуқаролар ўртасида жамоат транспорти хизматларидан, тўхташ жойлари сони ва энг кўп ишлатиладиган маршрутлардан қониқишлари бўйича сўров ўтказади. Транспорт бошқармаси аҳолини кўпроқ қамраб олиш учун фуқаролардан саволларга онлайн жавоб беришни сўрамоқда. Ҳар бир сўров беш кун давомида ўтказилади.
Бош режа нима ва у нима учун керак?
Бош режа — бу шаҳарнинг транспорт соҳасидаги ривожланиш стратегияси. Сўровнома давомида йиғилган маълумотлар аҳолининг ҳаракатланиш оқимини моделлаштириш йўлида фойдаланилади. Бу эса истиқболдаги 15 йил давомида транспорт хизматларига бўлган талабни ҳисобга олган ҳолда транспорт режалаштиришни ривожлантириш имконини беради.
Тошкент аҳолиси ва меҳмонларининг жавобларидан келиб чиқиб транспорт трафигининг зичлиги ва шаҳарнинг турли нуқталаридаги аҳолининг концентрацияси аниқланади. Ушбу маълумотлар свефоторларни тўғри созлаш, жамоат транспортлари маршрутини оптималлаштириш, янги маршрутларни жорий этиш ва велойўлаклар, метрополитан ва бошқа турдаги транспорт воситаларини аҳоли талабидан келиб чиқиб қуриш имконини беради.
Қанақа сўровлар ўтказилади?
22 сентябрдан 26 сентябрга қадар волонтёрлар 28 та локация бўйича Тошкентдан кириш ва чиқиш жойларидаги ҳайдовчилар ўртасида йўл бўйи сўровларини ўтказади. Респондентларга ҳаракатланиш жойининг бошланиши ва якуний манзил, сафардан мақсад, транспорт воситасининг тури ва йўловчилар сони бўйича саволлар берилади. Бу каби ҳаракатларни мунтазам амалга оширувчилар қуйидаги ҳавола орқали сўровномада иштирок этиши мумкин.
Шундан сўнг, волонтёрлар шаҳар автотураргоҳлардаги ҳайдовчилар ўртасида сўров ўтказади. Саволлар шаклидан бўш автотураргоҳни қидиришга кетадиган вақт, тураргоҳлар сонидан қониқиш, респондентнинг яшаш жойи, сафар мақсади ва бошқалар ўрин олган. Интернет-сўровнома барча ҳайдовчилар учун ушбу ҳаволада мавжуд. Автотураргоҳ ID’си бўлимига мўлжални белгилаш лозим.
Шундан кейин бекатлардаги жамоат транспорти йўловчилари ўртасида сўровнома ўтказилади. Йўловчиларга ҳаракатланиш манзилининг бошланиши ва якуний манзил, тўлов тури (стандарт (1400 сўм), чегирма бўйича, бепул) жамоат транспорти воситасини неча маротаба алмаштириши, шунингдек, жамоат транспортининг хизмат кўрсатиш сифати ҳақида саволлар берилиб, уларнинг таклифлари қайд этиб борилади. Сўровномадан қуйидаги ҳавола орқали ўтиш мумкин. У ўзини жамоат транспорти йўловчиси деб ҳисоблайдиган барчага мўлжалланган.
Бундан ташқари, авиайўловчилар учун ҳам сўров шакли тақдим этилган. Ундан шаҳардан аэропортгача фойдаланиладиган трансфер, автотураргоҳлар сони ва аэропорт инфратузилмасидан қониқиш, сафар мақсади ва бошқа саволлар ўрин олган. Онлайн-сўровномада авиаташувчилар хизматидан мунтазам фойдаланадиганлар иштирок этиши мумкин.
Энг сўнггида волонтёрлар уйма-уй юриб фуқаролар ўртасида сўров ўтказади. Респондентларга иш ёки ўқиш жойи ва уй манзили (бу энг кўп фойдаланиладиган маршрутларни аниқлаш учун зарур), оилада шахсий транспорт воситасининг борлиги, унинг тури ва айрим техник тавсифлари, шунингдек, автотураргоҳл бўйича саволлар берилади.
Бундан ташқари, фуқаролардан кўчаларнинг, жамоат транспорти воситаларидан қониқиш даражаси, мунтазам ҳаракатланувчи маршрутлар бўйича маълумотларни қайд этиш сўралади.
Сўров шаклидан оиланинг умумий ва респондентнинг шахсий даромади бўйича саволларни ҳам ўз ичига олган. Транспорт бошқармасининг маълум қилишича, бу жамоат транспортларининг биридан бошқасига ўтилганидаги қийматни ва бошқа тарифларни аниқлаш учун зарур.
Ушбу сўровда Тошкент шаҳрининг барча фуқаролари ва меҳмонлари иштирок этади олади.
Аввалроқ Тошкент шаҳрида яқин 3 ой ичида жамоат транспорти йўналиш тармоғи оптималлаштирилиши ҳақида хабар қилинган эди.
Изоҳ (0)