Uzbekistan Airways компанияси 2020 йил 1 октябрдан бошлаб Тошкент ва Қирғизистон пойтахти Бишкек шаҳри ўртасидаги қатновлар сонини ҳафтасига 2 маротаба оширади. Бу ҳақда компания томонидан маълум қилинди.
Компания хабарида парвозлар ҳафтанинг қайси кунлари амалга оширилишига аниқлик киритилмаган, бироқ парвозлар вақти ва рейслар рақами кўрсатилган.
Тошкент—Бишкек йўналишидаги парвозлар 779 ва 777-рейсларда ҳафтасига икки марта амалга оширилади. Тошкентдан соат 07:05 ва 16:00 да учадиган ҳаво кемалари мос равишда 09:15 ва 18:10 да Бишкекка етиб боради.
Компания маълумотларига кўра, Бишкек—Тошкент йўналишида ҳам парвозлар ҳафтасига икки марта 780 ва 778-рейсларда амалга оширилади. Бишкекдан соат 18:40 ва 19:40 парвоз қиладиган ҳаво кемалари Тошкентга мос равишда 19:00 ва 20:00 да қўнади.
Мазкур қатновларга авиачипталарни авиакомпания веб-сайтидан, мобил иловаси орқали, шунингдек, Uzbekistan Airways’нинг энг яқин сотув офисларидан ёки Ўзбекистондаги авиакомпания ташувларини сотиш агентликларидан сотиб олиш мумкин.
Аввалроқ Қирғизистон Ўзбекистон билан мунтазам авиақатновни тиклаши ва Тошкентга парвозлар ҳафтада бир марта амалга оширилиши ҳақида хабар берилганди.
Эслатиб ўтамиз, Ўзбекистон 1 октябрдан бошлаб барча халқаро авиа, темир йўл ва автойўл қатновларини тиклайди.
Изоҳ (0)