Ўзбекистон Давлат солиқ қўмитаси ҳузуридаги Кадастр агентлиги директорига 4 нафар ўринбосар тайинланди. Бу ҳақда агентлик маълум қилди. Маълум қилинишича, Отабек Валижонович Аллаберганов Кадастр агентлиги директорининг биринчи ўринбосари этиб тайинланди. Отабек Валижонович Аллаберганов Давлат чегарасини делимитация ва демаркация қилиш, ерни масофадан туриб зондлаш, геодезия ва картография ҳамда аэрогеодезия йўналишларига раҳбарлик қилади.
О. Аллаберганов бунга қадар Ўзбекистон Президенти Администрацияси Ҳуқуқий экспертиза ва комплекс таҳлил қилиш департаменти иқтисодий ривожланиш соҳасида тизимли таҳлил қилиш ва янги ташаббусларни ишлаб чиқиш шўъбаси етакчи инспектори лавозимида фаолият юритган. Тўлқин Мансурович Абдуллаев Давлат солиқ қўмитаси ҳузуридаги Кадастр агентлиги директори ўринбосари лавозимини эгаллаган. Тўлқин Мансурович Абдуллаев Фото: Кадастр агентлиги Тўлқин Абдуллаев агентликда ер, кадастр ва геодезия назоратини, давлат картография-геодезия фонди ҳамда давлат ер лойиҳалаш ишлари йўналишларига раҳбарлик қилади. У бунга қадар «Давергеодезкадастр» қўмитаси раисининг биринчи ўринбосари лавозимида фаолият юритган. Мирсаид Содиқович Мирмақсудов ҳам Кадастр агентлиги директори ўринбосари этиб тайинланган.
Мирсаид Содиқович Мирмақсудов агентликда Давлат кадастрларини юритиш, ИТ-технологиялар, компьютерлаштириш, ахборот хавфсизлигини ҳамда геоахборот технологияларини жорий этиш, шунингдек, Давлат кадастрлари палатаси йўналишларига раҳбарлик қилади. У бунга қадар Давлат ахборот тизимларини яратиш ва қўллаб-қувватлаш бўйича ягона интегратор «Ўзинфоком» бош директор ўринбосари лавозимида фаолият юритиб келган. Абдушукур Ҳамидович Абдуллаев Кадастр агентлиги директорининг ўринбосари — «Геоинновация маркази» давлат унитар корхонаси директори этиб тайинланди.
Абдушукур Ҳамидович Абдуллаев агентликда учувчисиз учиш қурилмаларидан (дронлар) фойдаланиш ва уларни таъмирлаш ишлари ҳамда соҳа бўйича кадрлар тайёрлаш масалларига раҳбарлик қилади. Абдушукур Абдуллаев 2017–2020 йилларда Ер ресурслари, геодезия, картография ва давлат кадастри давлат қўмитаси («Давергеодезкадастр») раиси бўлган, қўмитага Ҳалилилло Тўрахўжаев раис бўлиб келгач, раис ўринбосари — «Геоинновация маркази» давлат унитар корхонаси директори лавозимига ўтказилганди.
Эсатиб ўтамиз, Шавкат Мирзиёевнинг 2020 йил 7 сентябрдаги фармони билан «Давергеодезкадастр» Кадастр агентлигига айлантирилди. Кейинроқ Ҳалилилло Тўрахўжаев агентлик директори этиб тайинланди.
Изоҳ (0)