Ўзбекистонда олий таълим муассасалари сони сўнгги уч йил ичида 47 тага кўпайиб, бугунги кунда 125 та олий таълим муассасалари фаолият юритмоқда. Бу ҳақда 2020 йил 21 сентябрь куни «Ёшларни олий таълим билан қамраб олиш даражасини ошириш» мавзусида бўлиб ўтган матбуот анжуманида бош бошқарма бошлиғи Абдували Ҳолиқов маълумот берди.
Унинг айтишича, бу йил олий таълим муассасалари бакалавриатига кундузги, сиртқи ва кечки таълим шаклларида жами 162 минг 364 нафар абитуриент талабаликка қабул қилинади. Натижада ёшларни олий таълим билан қамраб олиш 9 фоиздан 25 фоизгача кўтарилди.
«Таълим сифатини яхшилаш учун олий таълим муассасаларида МДҲ ва Европанинг қатор нуфузли олий ўқув юртлари билан ҳамкорликдаги «double degreye» таълим дастури асосида ўқитиш қамрови кенгаймоқда. Ўтган ўқув йилида 22 та давлатнинг 104 та етакчи университетлари билан ҳамкорликда қўшма таълим дастурлари асосида 83 та таълим йўналиши ва магистратуранинг 64 та муҳандислиги бўйича кадрлар тайёрлаш йўлга қўйилди. Бундан ташқари, сўнгги йилларда кундузги таълим шаклида ёшларни талабаликка қамраб олиш даражаси етарли бўлмаганлиги учун сиртқи ва кечки таълим шаклларида квоталарни ошириб бормоқдамиз», – деди бош бошқарма бошлиғи Абдували Ҳолиқов.
Матбуот анжуманида айтилишича, айни пайтда 201 та коллеж ва 185 та техникумга қабул жараёнлари давом этмоқда. Олий таълим муассасаларига имтиҳон топширган, лекин паст балл тўплаган абитуриентлар мана шу техникум ва коллежларга ҳужжат топшириши мумкин. Бу билан ушбу таълим муассасаларида икки йиллик таҳсилдан сўнг фанларни ўзлаштиришда алоҳида муваффақиятларга эришган битирувчилар олий таълим муассасаларида ўқиган касби бўйича суҳбат асосида ўқишга қабул қилиниши мумкин. Ҳужжатлар шу йилнинг 25 сентябрига қадар қабул қилинади.
Изоҳ (0)