Тошкент шаҳар ИИББ Юнусободда тунги клуб ёнида юз берган пичоқбозлик юзасидан маълумот берди
Тошкент шаҳри Юнусобод туманида бир гуруҳ шахслар ўзаро жанжаллашиши оқибатида 2 киши вафот этгани хабар қилинганди. Тошкент шаҳар ИИББ мазкур ҳодиса юзасидан қўшимча тафсилотларни эълон қилди.
Бошқарма хабарига кўра, 20 сентябрь куни эрталаб соат 6:00 атрофида патруль-пост хизмати ходимларига Амир Темур кўчасидаги тунги клуб ёнида муштлашув юз бергани ҳақида маълумот келиб тушган. Ходимлар воқеа жойига етиб келганида пичоқ билан яраланган тўрт нафар йигитдан бири – 18 ёшли А.Г. воқеа жойининг ўзида ҳаётдан кўз юмгани ойдинлашган. Уч нафар йигит шифохонага етказилган. Шифохонада жанжалда иштирок этганлардан яна бири – 23 ёшли Д.С. ҳам ҳаётдан кўз юмган. 21 ёшли А.А. ва 28 ёшли А.Т. айни вақтда шифохонага жойлаштирилган.
Келишмовчилик икки гуруҳ йигитлари орасида келиб чиққан. 8 кишидан иборат бўлган биринчи гуруҳ орасида икки нафар қиз ҳам бўлган ва уларнинг ҳаммаси Амир Темур кўчасида жойлашган тунги клуб ёнида бўлган. 5 кишилик иккинчи гуруҳ ҳам ўша атрофда бўлган.
«Қизлардан бирининг ўз гуруҳидаги йигитга айтган гапи бошқа гуруҳдаги йигитга худди унга айтилгандек туюлган. Шу сабабли орада келиб чиққан можаро муштлашувга айланиб кетган», – дейилади хабарда.
Аниқлик киритилишича, муштлашув давомида иккинчи гуруҳ иштирокчиси 23 ёшли С.Х. пичоқ чиқариб, тартибсиз равишда зарба беришни бошлаган. Оқибатда тўрт нафар йигит жабрланиб, улардан икки нафари вафот этган.
Воқеа жойига етиб келган Тошкент шаҳар ИИББ ходимлари томонидан 23 ёшли С.Х., 18 ёшли С.К., 23 ёшли Р.Х. ва яна бир неча киши қўлга олиниб, ички ишлар бўлимига олиб кетилган. Тошкент шаҳар прокуратураси томонидан мазкур факт асосида Ўзбекистон Республикаси Жиноят кодексининг 97-моддаси 2-қисми (қасддан одам ўлдириш) бўйича жиноят иш қўзғатилди. Гумонланувчи тариқасида жиноий ишга жалб қилинган С.Х. қўлга олинган.
Айни вақтда келишмовчиликнинг яна икки нафар иштирокчиси С.К. ва Р.Х.га нисбатан Ўзбекистон Республикаси Жиноят кодексининг 277-моддаси 2-қисми (безорилик) бўйича жиноий иш қўзғатилди. Мазкур шахслар ҳам қўлга олинган.
«Келишмовчиликнинг бошқа иштирокчиларини қўлга олиш бўйича чоралар кўрилмоқда», – дейилади ИИББ ахборотида.
Июнь ойида Тошкентдаги кичик ҳалқа йўлининг Шайхонтоҳур туманидан ўтган, халқ орасида «Арча-кўча» номи билан танилган қисмида бир гуруҳ ёшлар ўртасида жанжал ва пичоқбозлик юз бериши оқибатида бир йигит вафот этган ва пичоқбозликка алоқадор бир неча шахс қўлга олинганди. Кейинчалик можаро дорихонадан тушадиган пулни деб келиб чиққани айтилганди.
