“Archa ko‘cha”dagi pichoqbozlikka aloqador bir necha shaxs qo‘lga olindi
Toshkentdagi kichik halqa yo‘lining Shayxontohur tumanidan o‘tgan qismida 5-iyun kuni ommaviy pichoqbozlik yuz bergani, ikki kishi jarohatlangani haqida xabar berilgan edi. Keyinroq mojaro ishtirokchilaridan biri olgan tan jarohatlari oqibatida vafot etgani ma’lum bo‘lgandi. Poytaxt IIB matbuot xizmatining xabari qilishicha, pichoqbozlik ishtirokchilaridan yana biri og‘ir ahvolda.
“Shifokorlarning sa’y-harakatlariga qaramay, kelishmovchilik ishtirokchilaridan biri shifoxonada hayotdan ko‘z yumdi. Shifokorlar ikkinchi yigitning holatini og‘ir deb baholamoqda. Yana ikki nafar yigitga ham og‘ir tan shikastlari yetgan”, — deyiladi xabarda.
Ma’lumotlarga ko‘ra, janjal 27 yoshli D.M. biznes hamkori — 1988-yilda tug‘ilgan B.R. bilan Toshkentning Lutfiy ko‘chasida joylashgan dorixonadan tushadigan daromad sabab paydo bo‘lgan kelishmovchilikdan yuzaga kelgan.
Mazkur fakt asosida Toshkent shahar prokuraturasi tomonidan Jinoyat kodeksining 97-moddasi (Qasddan odam o‘ldirish) bo‘yicha jinoiy ish qo‘zg‘atildi. Dastlabki tergov bilan prokuratura organlari shug‘ullanmoqda.
Mavzuga doir: “Archa ko‘cha”dagi bir kishini o‘ldirgan pichoqbozlik: mojaro dorixonadan tushadigan pulni deb kelib chiqqan
