Қашқадарё ҳокими Зоир Мирзаев вилоятдаги мавжуд туман ва шаҳар ҳокимларининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарлари фаолиятини танқид қилди. Бу ҳақда Халқ депутатлари вилоят кенгашининг олтинчи чақириқ, ўн иккинчи сессиясида маълум қилинди, дея хабар берди «Дарё» мухбири.
«Фақат қоғоз орқали ишини битказишга ўрганган ўринбосарлар бор. Ҳалиям шундай ишлашда давом этяпти. Айтиб қўяй, бу тартибда ишлаётган ўринбосарларнинг жавобгарлиги қаттиқ бўлади. Халқ таълими тизимидан ҳам қониқиш ҳосил қилмаяпман. Мактаблар аҳволи қониқарсиз. Буни Рустам Йўлдошев бошчилигидаги масъуллар билиши керак ва хулоса қилиши лозим», — деган вилоят ҳокими Зоир Мирзаев.
Зоир Мирзаев сессияда ОАВлар фаолиятига ҳам тўхталиб ўтиб, вилоятнинг Деҳқонобод туманидан видеомурожаат йўллаган фуқаро ишига фикр билдирган ҳамда вазиятни очиқ-ойдин кўрсатиб берган журналистларга миннатдорлик изҳор қилган.
«Оммавий ахборот воситаларига раҳмат, борини борича кўрсатишди. Момо ‘мендан ҳеч ким хабар олмайди, ҳоким уйимга келмайди. Ҳеч нарсамиз йўқ, қийналиб қолдик’ деяпти. Маҳалла раиси эса ҳар доим хабар олганини, ёрдам берганини айтяпти. Мурожаатчи ҳеч нарсам йўқ деяпти-ю, аммо уйининг ёнида қўй, сигир турибди. Журналист момо билан суҳбатлашиб, борини кўрсатди. Хулоса сиздан, дея охирини тугатишган. Журналистларга раҳмат», — дея фикр билдирган вилоят ҳокими.
Эслатиб ўтамиз, аввалроқ деҳқонободлик аёл Зоир Мирзаевга видеомурожаат қилиб, уни ҳеч ким эшитмаётганини, оилавий шароити оғир эканлигини айтганди. Деҳқонобод ҳокимлиги эса мурожаатчи масъуллар эътиборида эканини маълум қилганди. Деҳқонободлик яна бир аёл туман ҳокимига «Одамлардан 35 миллион қарзим бор, ҳокимият тўлаб берсин» дея ижтимоий тармоқ «қаҳрамони»га айланганди.
Изоҳ (0)