Бухоро вилоятида Олий таълим муасссасаларига ўқишга кириш имтиҳонларида тартиб-қоидаларга риоя қилмаган 69 нафар абитуриент имтиҳондан четлатилган. Бу ҳақда «Дарё»га давлат тест маркази Бухоро вилоят бўлими бош мутахассиси Иззат Раҳмонов хабар берди.
Таъкидланишича, 2020 йилда вилоятда ОТМларнинг бакалавр йўналишига ўқишга кириш иштиёқида бўлганлар учун тест синовлари Бухоро шаҳрининг Бухоро спорт мажмуаси, Умид ўйингоҳи ҳамда Дилкушо теннис мажмуасида бўлиб ўтган.
«Бухорода ўтказилган тест синовларида жами 66 352 нафар абитуриент имтиҳон топшириши белгиланган эди. Бироқ турли сабабларга кўра 2 248 нафар абитуриент қатнашмади. 69 нафар абитуриент эса белгиланган тартиб-қоидаларга риоя қилмагани сабабли имтиҳонлардан четлатилди», — деди Иззат Раҳмонов.
Айтилишича, тест синовларида 206 нафар гуруҳ назоратчилари иштирок этган.
Имтиҳонлардан четлатилган 69 нафар абитуриентнинг 32 нафари назоратдан ўтказиш жойида телефон аппарати ва «шпаргалка» олиб киришга уринган. 36 нафари эса қулоқчин олиб киришга уринишидан ташқари, ҳужжатларини сохталаштиргани ва бировнинг ўрнига киришга урингани аниқланган. 1 нафар абитуриент тана ҳароратининг кўтарилгани сабабли имтиҳондан чиқариб юборилган.
Изоҳ (0)