Deutsche Bank ғарб давлатларининг коронавирусга қарши эмланишга қанчалик тайёрлигини баҳолади

Буюк Британияда коронавирусга қарши вакцина тайёр бўлиши билан дастлабки олти ой ичида эмланишга рози бўлган респондентлар улуши 78 фоизни ташкил этмоқда. Бу ҳақда Deusche Bank томонидан олтита ғарб мамлакатлари — Буюк Британия, Франция, АҚШ, Италия, Испания ва Германияда ўтказилган сўровнома натижаси маълум бўлди, деб хабар беради «РБК».

Британияликларнинг 9 фоизи вакцинациядан ўтишни истамаслигини кўрсатган бўлса, 13 фоизи бирор қарор қабул қилишга шошилмаган. Коронавирусга қарши эмланишга тайёрлар улуши бўйича иккинчи ўринни АҚШ эгаллаган — респондентларнинг 75 фоизи (14 фоизи эмланишга рози бўлмаган, 11 фоиз бироқ қарор қабул қила олмаган). Францияда ушбу кўрсаткич 61 фоизни (19 фоизи тайёр эмас), Испанияда — 72 фоиз (11 фоизи тайёр эмас), Германияда — 70 фоиз (16 фоизи тайёр эмас) ҳамда Италияда эса — 70 фоизни (18 фоизи тайёр эмас) ташкил этган.

Бундан ташқари, Испания, Германия, Британия ва Италиядаги респондентларнинг ярмидан кўпи COVID-19’га қарши эмлашни мажбурий равишда амалга ошириш лозим деб ҳисобламоқда. Францияда бу каби фикрни сўров иштирокчиларининг 42 фоизи қўллаб-қувватлаган, 39 фоизи — бунга қарши.

Таъкидланишича, вакцинация учун икки маротаба укол қилиш лозимлиги ҳисобга олинадиган бўлса, коронавирусга қарши бутун дунё аҳолисини эмлаш учун 15 миллиард доза керак бўлади. Дунёда катта ҳажмда дори воситасини ишлаб чиқаришга тўрт ёки олтита компания қодир, бу эса глобал кўламда вакцинацияни амалга оширишни қийинлаштиради.

Шу йилнинг охирига қадар COVID-19’га қарши 800 миллион доза вакцина ишлаб чиқарилиши керак, кейинги йил охирига бориб эса — 4,5 миллиард дозага етади.

Аввалроқ Жаҳон соғлиқни сақлаш ташкилотининг Европа минтақаси бўйича директори Ҳанс Клюге коронавирусга қарши яратиладиган бўлажак вакцина пандемияга чек қўя олмаслиги ва аҳолининг барча қатлами учун бирдек самарали бўлмаслигини маълум қилгани тўғрисида хабар берилганди.

Эслатиб ўтамиз, август охирларида Россия ва Қозоғистон ўртасида «Спутник V» вакцинасини етказиб бериш тўғрисида битим имзолангани, Россияда грипп ва коронавирусга қарши ягона вакцина яратилаётгани, «Роспотребнадзор»нинг «Вектор» давлат илмий маркази томонидан ишлаб чиқилган коронавирус инфекциясига қарши иккинчи вакцинанинг клиник синовлари иккинчи босқичи якунига етказилиши билан гувоҳномага эга бўлиши мумкинлиги ҳақида хабарлар берилганди. Бир неча кун олдин Британия—Швециянинг AstraZeneca компанияси томонидан яратилган коронавирусга қарши вакцина синовлари беморларнинг бирида иккиламчи таъсир пайдо бўлгани сабаб тўхтатилган эди.