Россия Ички ишлар вазирлиги мамлакатга ишлаш учун келадиган мигрантлар учун ягона аванс солиғи жорий этишни таклиф қилди. Бу ҳақда вазирлик томонидан тайёрланган миграция масалалари бўйича янги қонун лойиҳаси концепциясида қайд этилган, деб хабар беради «РИА Новости».
Мазкур ташаббус доирасида бу турдаги солиқни тўлаш учун электрон патент расмийлаштириш талаб қилинади. Мигрантларни ишга ёллашни хоҳловчи иш берувчилар (жисмоний, юридик шахслар, шунингдек, якка тадбиркорлар) шахсий кабинетда рўйхатдан ўтиши ва махсус шаклни тўлдириши лозим бўлади.
Рўйхатдан ўтилганидан сўнг, хорижлик ишчини ёллаган иш берувчиларни реестрга қўшиш тўғрисидаги аризани электрон кўринишда тизимдаги юклаши керак.
Шунингдек, қонун лойиҳасида чет элликларнинг ишлаш шартларини акс эттириш таклиф этилмоқда: масалан, мазкур тоифадаги ишчилар учун минтақадаги ўртача иш ҳақига мос маош, Россия қонунларини бузганлик учун тўланмаган жарималарнинг йўқлиги.
Концепцияга кўра, аванс солиғи кўринишидаги даромад солиғи тўланмаган тақдиримда мигрантларга солиқни 15 кун ичида тўлаш талаб қилинган хабарнома юборилади. Солиқни тўламаганларга Россияда ишлаш тақиқланиши ва мамлакатдан депортация қилиниши мумкин.
Шунингдек, ИИВ Россияда 30 кундан ортиқ вақт давомида бўлган барча мигрантларга бармоқ излари, фотосурат, тиббий кўрикдан ўтиши ва ID-карталарни олиш мажбуриятини юкламоқчи.
Эслатиб ўтамиз, август ойида Россияда мигрантларни рўйхатга олиш ва уларни огоҳлантиришга мўлжалланган платформа яратилаётгани тўғрисида хабар берилганди. Сентябрдан бошлаб эса Россияда чет элликларга ўз уйларида мигрантларни рўйхатдан ўтказишга рухсат берилди.
Изоҳ (0)