Россия Беларусдаги сайловлар натижасини тан олади ва Александр Лукашенкони мамлакатнинг қонуний президенти деб ҳисоблайди. Бу ҳақда Россия президентининг матбуот котиби Дмитрий Песков Лукашенко ва Путин ўртасидаги музокаралар якуни бўйича маълум қилди, деб хабар беради Meduza.
«Александр Григоревич Беларуснинг легитим президенти ҳисобланади. Сайлов натижасини тан олмаган инсонлар қардош Беларусь давлатининг фуқаролари бўлиб, уларнинг барчасини қадрлаймиз ва яхши кўрамиз. Бироқ Беларусда содир бўлаётган барча ишлар конституцияга хос бўлмаган шаклда эмас, балки ҳуқуқий майдонда бўлишини хоҳлаймиз», — дейди Песков.
Шунингдек, Песковнинг таъкидлашича, Россия Беларусь иқтисодиётига ёрдам кўрсатиб келган ва уни қўллаб-қувватлашда давом этади. Президент матбуот котибининг сўзларига кўра, Москва 1,5 миллиард доллар миқдоридаги кредитни Лукашенкога эмас, Беларусга бермоқда.
Маълумот учун, 2020 йилнинг биринчи чораги якунларига кўра, Россия кредитлари Беларусь ташқи қарзининг 48 фоизини ёки 7,92 миллиард долларни ташкил этди. 2008 йилдан бери Россия ҳукумати ва Россиянинг ташқи иқтисодий фаолият банки Беларусга камида саккизта кредит ажратган.
Август ойи охирида Александр Лукашенко Владимир Путин билан Минскка илгари берилган 1 миллиард долларлик кредитни қайта молиялаштиришга келишиб олганини маълум қилган. Сентябрда Беларусь ҳукумати Россия ҳукуматига 2021 йилда давлат қарзини 600 миллион доллар миқдорида қайта молиялаштириш тўғрисида ариза юборгани маълум бўлди.
Мавзуга доир: Bloomberg: Москва Беларусдаги норозилик намойишлари кўламидан ҳайратда, бироқ Путин бу Лукашенкони ағдара олишига ишонмайди
Изоҳ (0)