Россия президенти Владимир Путин Беларусь президенти Александр Лукашенко билан учрашув чоғида Россия Беларусга 1,5 миллиард доллар миқдорида давлат кредити тақдим этишини маълум қилди. Бу ҳақда Meduza хабар берди.
«Биз Беларусга ҳозирги қийин пайтда давлат кредити — 1,5 миллиард доллар беришга келишиб олдик ва биз буни бажарамиз. Билишимизча, молия вазирларимиз бу борада профессионал даражада иш олиб бормоқда», — деди Путин Сочидаги Бочаров Ручей қароргоҳидаги учрашувда.
Россия Беларусь ҳукумати учун ташқи қарз олишнинг асосий манбайи ҳисобланади. 2020 йилнинг биринчи чораги якунларига кўра, Россия кредитлари Беларусь ташқи давлат қарзининг 48 фоизини ёки 7,92 миллиард долларни ташкил этди. 2008 йилдан бери Россия ҳукумати ва Россиянинг ташқи иқтисодий фаолият банки Беларусга камида саккизта кредит ажратган.
Август ойи охирида Александр Лукашенко Владимир Путин билан Минскка илгари берилган 1 миллиард долларлик кредитни қайта молиялаштиришга келишиб олганини маълум қилган. Сентябрь ойида Беларусь ҳукумати Россия ҳукуматига 2021 йилда давлат қарзини 600 миллион доллар миқдорида қайта молиялаштириш тўғрисида ариза юборгани маълум бўлди.
Изоҳ (0)