Франция президенти Эммануэль Макрон Россия президенти Владимир Путин билан телефон мулоқоти чоғида франциялик мутахассислар Алексей Навальний «Новичок» гуруҳига кирувчи асаб тизимини фалаж қиладиган модда билан заҳарлангани ҳақидаги германиялик мутахассисларининг хулосасини тасдиқлаганини маълум қилди. Бу ҳақда Meduza хабар берди.
Суҳбат чоғида Макрон Навальнийга суиқасд қилингани билан боғлиқ вазиятга зудлик билан ойдинлик киритишга чақирган. У Россия томонидан ишончли ва шаффоф тергов доирасида тушунтириш беришни талаб қилган.
Кремль томонидан маълум қилинишича, суҳбат Франция президенти ташаббуси билан амалга оширилган ва «Алексей Навальний иши» билан боғлиқ вазият муҳокама қилинган. «Владимир Путин ушбу вазият бўйича Россия томонининг асоссиз айбланиши ноўринлигини таъкидлади», — дейилади Кремль хабарида.
Путиннинг Макронга айтишича, бўлиб ўтган ҳодисанинг ҳақиқий ҳолатларини аниқлаш учун Германия Россияга Навальнийнинг биоматериалларини, шунингдек, ундан олинган таҳлил натижалари бўйича расмий баёнотни тақдим этиши керак. Бундан ташқари, Путиннинг фикрича, германиялик мутахассислар россиялик шифокорлар билан ҳамкорликда ишлаши керак.
Германия ҳукумати 14 сентябрь куни Франция ва Швециядаги лабораториялар Навальнийнинг организмида «Новичок» гуруҳига кирувчи модда бўлганини тасдиқлаган.
Аввалроқ Алексей Навальний заҳарланганидан сўнг тўлиқ ўзига келгани, Германия Навальнийнинг заҳарланишига оид маълумотларни Кимёвий қуролни тақиқлаш ташкилотига юборгани ҳақида хабарлар берилганди.
Эслатиб ўтамиз, 2 сентябрь куни Германия ҳукумати Навальний Россияда «Новичок»га ўхшаш модда билан заҳарланганини маълум қилган. Германия канцлери Ангела Меркель Россия ҳукумати Навальний заҳарланиши билан боғлиқ жиддий саволларга жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона иш» деб атади. Вашингтон айбдорларга нисбатан молиявий чекловлар қўллашга ваъда берди.
Изоҳ (0)