Қашқадарё вилоятида тунда Damas ҳайдовчисининг велосипедчини уриб юбориши оқибатида 57 ёшли фуқаро ҳаётдан кўз юмди. Бу ҳақда ЙҲХББ ахборот хизмати хабар берган.
«2020 йилнинг 13 сентябрь куни соат 01:30 ларда Қашқадарё вилояти, Қарши тумани, «Истиқлол» МФЙ ҳудудидан ўтган 4Р-92 автомобиль йўлининг 7-километрида Damas ҳайдовчиси 1995 йилда туғилган Ф.Ч. йўлнинг белгиланмаган жойидан кесиб ўтаётган велосипедчи 1963 йилда туғилган Ф.Б.ни уриб юбориб, ЙТҲ содир этган.
Йўл-транспорт ҳодисаси оқибатида велосипедчи 57 ёшли Ф.Б. оғир тан жароҳатлари олиб шифохонада вафот этди», – дейилади хабарда.
Шунингдек, ЙҲХББ мазкур ЙТҲ юзасидан Қарши тумани ИИБ ҳузуридаги тергов бўлими томонидан терговолди суриштирув ҳаракатлари олиб борилаётгани, Damas ҳайдовчиси Ф.Ч. бир йил мобайнида бир марта йўл қоидабузарлигини содир этгани аниқланганини маълум қилган.
Июль ойида Қашқадарё вилоятининг Қарши шаҳрида Сobalt ҳайдовчиси велосипед бошқариб кетаётган 30 ёшли аёлни уриб юборгани, тан жароҳати олган аёл воқеа жойида вафот этгани хабар қилинганди.
Изоҳ (0)