2020 йил 13 сентябрь куни соат 01:45 ларда Фарғона вилояти, Учкўприк туманида юк машинаси велосипедчини уриб юбориши оқибатида йўл-транспорт ҳодисаси содир этилди. Бу ҳақда Йўл ҳаракати хавфсизлиги бош бошқармаси хабар қилди.
Хабарга кўра тумандаги «Меҳнатобод» МФЙ ҳудудидан ўтган А-373 Тошкент – Ўш автомобиль йўлининг 335-километрида 1993 йилда туғилган Х.Т. бошқарувидаги Isuzu ўзи билан бир йўналишда олдинда ҳаракатланиб кетаётган велосипедчи, 1983 йилда туғилган Х.Т.ни уриб юборган.
Оқибатда 37 ёшли Х.Т. оғир тан жароҳатлари олиб шифохонада вафот этган.
«Мазкур ЙТҲ юзасидан Учкўприк тумани Ички ишлар бошқармаси ҳузуридаги Тергов бўлими томонидан Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган ва тергов ҳаракатлари олиб борилмоқда», – дейилади ЙҲХББ ахборотида.
Фарғона вилоятида машина ҳайдовчиларининг велосипедчиларни уриб юбориши билан боғлиқ йўл-транспорт ҳодисалари сўнгги вақтларда кўп содир бўлмоқда.
Август ойида 29 июлда Фарғона вилоятининг Ўзбекистон туманида юк машинаси пиёдани уриб юбориши оқибатида 66 ёшли пиёда воқеа жойида вафот этгани хабар қилинган. 5 сентябрь куни эса Фарғона вилоятининг Фарғона туманида Nexia ҳайдовчиси велосипед бошқариб кетаётган 57 ёшли фуқарони уриб юборган ва жабрланувчи П.В. воқеа жойида ҳаётдан кўз юмган.
Май ойида Йўл ҳаракати хавфсизлиги бош бошқармаси Фарғона вилоятида одам ўлими билан якунланган учта йўл-транспорт ҳодисаси ҳақидаги репортажни эълон қилган. Унда Ёзёвон тумани Хонобод қишлоғи ҳудудида Isuzu юк машинаси йўлнинг ўнг томонидан ҳаракатланиб бораётган велосипедчини уриб юборгани ва йўловчи ҳодиса жойида ҳалок бўлгани, Данғара тумани Қўриқ қишлоғида содир бўлган ЙТҲда эса 28 ёшли Captiva ҳайдовчиси қатнов қисмини кесиб ўтаётган велосипедчини уриб юборгани, 54 ёшли эркак олган тан жароҳатлари туфайли шифохонада вафот этгани хабар қилинган.
Изоҳ (0)