БАА янги карантин жорий этмайдиган бўлди

Бирлашган Араб Амирликларининг Фавқулодда вазиятлар, инқироз ва табиий офатлар бўйича миллий бошқармаси COVID-19 билан касалланиш ҳолатлари ошиб бораётган бир пайтда қатъий карантин ёки янги комендантлик соати жорий этишни режалаштирмаяпти.

БААнинг Соғлиқни сақлаш ва профилактика вазирлиги расмий вакили, доктор Фарида ал-Хосанийнинг матбуот анжуманида маълум қилишича, сўнгги суткада COVID-19’га чалиниш бўйича 910 та янги ҳолат аниқланган бўлиб, бу сўнгги ойлардаги антирекорддир. Касалланиш ҳолатларининг умумий сони эса 76 911 нафарга етди, беморларнинг 67 945 нафари тўлиқ соғайди, 398 киши коронавирус инфекцияси асоратларидан вафот этди.Вазирлик вакилининг таъкидлашича, COVID-19 ҳолатлари аниқланган тақдирда БААдаги мактаблар 14 кунга ёпилади. Шунингдек, у коронавирус ташувчилари билан мулоқотда бўлган барчани, ҳатто тест салбий натижа кўрсаца ҳам, 14 кун давомида ўзини яккалашга чақирди.

Вазирликнинг аниқлик киритишича, юқтириш ҳолатларининг 88 фоизи оммавий йиғилишлар, мажлислар, шу жумладан, тўйларда содир бўлган. Юқтириш ҳолатларининг атиги 12 фоизи чет элдан қайтиб келган саёҳатчиларда қайд этилган. Шу сабабли соғлиқни сақлаш идоралари барча маҳаллий аҳолини ниқоб тақиш, ижтимоий масофани сақлаш, қўлларни тез-тез ювиш ва ўзини ёмон ҳис қилса уйдан чиқмаслик каби коронавируснинг олдини олиш қоидаларига қатъий риоя этишга чақирмоқда.

Эслатиб ўтамиз, ЖССТ ҳукуматларни карантин чекловларини бошқа жорий қилмасликка чақирганди. Европада карантин чекловлари олиб ташлангач, коронавирус инфекциясига чалиниш ҳолатлари кескин ошганди.