АҚШ президенти Дональд Трампнинг маълум қилишича, Исроил ва Баҳрайн муносабатларни яхшилашга келишиб олган. У мазкур келишувни навбатдаги тарихий ғалаба деб атади. Бу ҳақда «Интерфакс» хабар берди.
«Бизнинг иккита яқин дўстимиз— Исроил ва Баҳрайн қироллиги тинчлик шартномасини имзолашга келишиб олди. 30 кун ичида иккинчи араб мамлакати Исроил билан ярашишга розилик билдирди», — дея ёзган Трамп.
Трамп келишув 11 сентябрда бўлиб ўтган музокараларда эришилгани ҳақидаги уч томонлама расмий баёнотни эълон қилди. Музокараларда АҚШ президенти Дональд Трамп, Баҳрайн қироли Ҳамад бин Исо ал-Халифа ва Исроил бош вазири Бинямин Нетаньяху иштирок этган. Томонлар дипломатик муносабатларни тўлиқ ҳажмда ўрнатилишига келишиб олган.
https://twitter.com/realДональдTrump/status/1304464848831631361
Шунингдек, Баҳрайн қироли 15 сентябрь куни Оқ уйда бўлиб ўтадиган БАА ва Исроил ўртасида дипломатик алоқалар ўрнатилиши ҳақидаги келишувни имзолаш маросимига таклифни ҳам қабул қилган.
«Бу Яқин Шарқда тинчлик ўрнатилиши бўйича тарихий ғалаба. Тез ривожланаётган бу икки жамият ва ривожланган иқтисодиётлар ўртасида тўғридан-тўғри мулоқот ва алоқаларнинг ўрнатилиши Яқин Шарқдаги ижобий ўзгаришларни давом эттиради ва минтақада барқарорлик, хавфсизлик ва фаровонликни кучайтиришга хизмат қилади», — дейилади баёнотда.
Эслатиб ўтамиз, август ойида БАА ва Исроил расмиялари тинчлик келишувига эришгани ҳақида маълум қилганди. Расмий келишув 2020 йил 15 сентябрда АҚШда имзоланади. Шунингдек, БАА Исроилга нисбатан 48 йил давом этган иқтисодий бойкотни бекор қилди. Исроилдан БААга тарихдаги биринчи тўғридан-тўғри тижорий рейс амалга оширилди.
Изоҳ (0)