«Чироқчи воқеаси» айбдорлари ишини кўриб чиқаётган суд мажлисида маълум қилинишича, тергов ҳаракатлари давомида Чироқчи туман ИИБдан олинган «противогаз»ларнинг биридан марҳум Юсуф Абдураҳмоновнинг қон излари чиққан. Бу ҳақда суд мажлисида иштирок этган «Дарё» мухбири маълум қилди.
Таъкидланишича, туман ИИБдан марҳум Юсуф Абдураҳмоновнинг мурдаси чиққач, мазкур ишни вилоят прокуратураси ўргана бошлаган. Тергов ҳаракатлари давомида туман ИИБда мавжуд бўлган «противогаз»лар ўрганиш учун олинган ва экспертизага юборилган.
Н.Саидова исмли давлат суд эксперти берган хулосада ИИБдан олинган «противогаз»ларнинг биридан марҳум Юсуф Абдураҳмоновнинг қон излари чиққан.
Аниқланишича, «Чироқчи воқеаси»ни ўрганиш давомида туман ИИБдан 43 дона «противогаз» олинган.
Эслатиб ўтамиз, марҳум Юсуф Абдураҳмоновга ўғрилик қилишда шерикликда гумонланиб қийноққа солинган Қурбон Остоноев 2020 йил 21—22 январь кунидаги воқеаларни эсга олар экан, ўша куни ИИБ ходимлари уни тилга олиб бўлмас сўзлар билан ҳақоратлаганини, Анвар Жонқобилов исмли ИИБ ходими буйруғига кўра Жасур Раҳмонов «противогаз» олиб келиб кийдирган ҳолда қийноққа солганини айтганди. Жабрланувчи Остоноев бу гапини судда ҳам такрорлади. Судга гувоҳ сифатида чақирилган ИИБ ходими Жасур Раҳмонов эса Анвар Жонқобилов топшириғига кўра, «противогаз» олиб борганини ва газ ниқобини жабрланувчига кийдириб қийноққа солганини рад этди.
Судда гувоҳликка чақирилган яна бир ИИБ ходими Фарид Ёдгоров эса ўша куни туман ИИБда навбатчи бўлганини, Жасур Раҳмонов исмли ходим ундан бир дона «противогаз» сўраб олганини ва, тахминан, бир соат ўтганидан сўнг қайтариб олиб келганини тан олди.
«Чироқчи воқеаси» айбдорлари ишини кўраётган суд мажлиси 2020 йил 16 сентябрь соат 14:00 га қадар танаффус эълон қилди.
Мавзуга доир:
Изоҳ (0)