«Авто 60 ой» иши бўйича суд мажлисларини республиканинг барча вилоятларида ўтказилади. Бу ҳақда жиноят ишлари бўйича Чилонзор туман суди маълум қилди.
Қайд этилишича, Қорақалпоғистон Республикаси ва вилоятлардан (Тошкент вилоятидан ташқари) бўлган жабрланувчиларга қулайлик яратиш мақсадида кейинги суд мажлислари барча вилоятларда ўтказилади.
Хусусан, «Kun.uz»нинг ёзишича, Андижон вилоятида яшовчи жабрланувчилар учун суд жараёнлари 2020 йил 14—19 сентябрь кунлари (душанбадан шанбага қадар) соат 09:00 дан 17:00 гача жиноят ишлари бўйича Андижон вилоят суди биносида (Андижон вилояти, Андижон шаҳри, Навоий шоҳкўчаси, 15-уй) бўлиб ўтади. Ушбу вилоятда «Авто 60 ой»дан 1813 киши жабрлангани қайд этилган.
Суд мажлиси бўлиб ўтадиган вақт ва жой тўғрисида Жиноят ишлари бўйича Чилонзор туман судининг Telegram-канали орқали хабар бериб борилади.
Эслатиб ўтамиз, «Авто 60 ой» МЧЖнинг мансабдор шахслари ва бошқаларга нисбатан 2019 йил 12 октябрь куни Жиноят кодексининг 188-1-моддаси 1-қисми (пул маблағларини ва/ёки бошқа мол-мулкни жалб этишга доир ноқонуний фаолият) билан жиноят иши қўзғатилган эди. Ушбу жиноят иши билан боғлиқ тергов ҳаракатлари 2 июнь куни якунланди.
Тергов материалларига кўра, «Авто 60 ой» МЧЖ вакиллари фуқароларга UzAuto Motors автомобилларини дастлабки тўлов ва фоизларсиз бўлиб тўлашга сотиб олишни таклиф қилиб, 19,3 минг мижоз билан шартнома тузиб, уларнинг 54,3 миллиард сўм миқдоридаги маблағларини жалб қилган. Етказилган моддий зарарнинг 36,8 миллиард сўми тергов давомида қопланган.
5 август куни «Авто 60 ой» МЧЖ мансабдорларига нисбатан қўзғатилган жиноят иши бўйича суд иши бошланди.
Изоҳ (0)