Kiyevda koronavirus bilan kasallanish bo‘yicha sutkalik rekord yangilandi. Shaharda karantin cheklovlari qaytarilmoqda

Kiyevda koronavirus infeksiyasi bilan kasallanish holatlari ortgani sabab shahar epidemiologik xavfning “sariq” zonasiga kiritildi va sanitar cheklovlarning bir qismi qaytarildi. Bu haqda meriya matbuot xizmati xabar berdi.

“Afsuski, yangiliklar taskin bermaydigan. Kiyev epidemiologik xavfning ‘sariq’ zonasiga kirdi. Buni favqulodda vaziyatlar bo‘yicha hukumat komissiyasi belgiladi”, — deydi shahar meri Vitaliy Klichko.

Shu munosabat bilan 220 dan ortiq odam ishtirok etadigan ommaviy tadbirlar taqiqlandi; kasalxonalarda rejali davolanish to‘xtatildi (homilador, yangi tug‘ilgan, saraton bilan kasallangan, hayot uchun xavfli kasallikka chalinganlardan tashqari); Kiyevdagi oliy ta’lim muassasalari va kollejlarda darslarni 20 kishidan oshmagan guruhlar uchun o‘tkazishga ruxsat beriladi.

Shuningdek, shaharda mehmonxonalardan boshqa joylashtirish bo‘yicha xizmat ko‘rsatuvchi barcha tashkilotlar, har bir tashrif buyuruvchini kamida 10 metr kvadrat metr joy bilan ta’minlay olmaydigan fitnes-markazlar yopiladi; sanatoriya va sog‘lomlashtirish lagerlari bolalarni qabul qilishni to‘xtatadi; jamoat transportlari uchun yo‘lovchilarni tashish sig‘imi 50 foiz etib belgilanadi.

Bundan tashqari, Klichko politsiyaga ham murojaat qilib, o‘zini o‘zi yakallagan holda davolanayotgan kasallarning bir joydan boshqa joyga ko‘chishini va ularning jamoat joylariga bormasligini diqqat bilan kuzatishni so‘ragan.

Ukraina Sog‘liqni saqlash vazirligining 11-sentabr kuni taqdim etgan hisobotiga ko‘ra, mamlakatda koronavirus bilan kasallanish bo‘yicha sutkalik rekord qayd etilgan.

O‘tgan bir sutka ichida Ukrainada yana 3144 kishida COVID-19 aniqlangan. Mamlakatda pandemiya boshlanganidan buyon kasallikka chalinganlar soni esa 148,7 ming kishidan oshgan.

Avvalroq Gruziya bosh vaziri mamlakatda koronavirusning ikkinchi to‘lqini boshlanganini e’lon qilgandi. Shuningdek, Turkiyada ham kasallar sonining ortiyotgani sabab barcha hududlarida niqob taqish majburiy etib belgilandi.