10 сентябрь куни Наманган вилоятининг Чортоқ туманида Cobalt русумли автомобилнинг каналга тушиб кетиши оқибатида ҳайдовчи ҳалок бўлди. Бу ҳақда ФВВ матбуот хизмати хабар берди.
Маълумотларга кўра, Cobalt автомобили ҳайдовчиси кескин бурилишда бошқарувни йўқотиб қўйиши оқибатида автомобиль бир неча марта ағдарилган ва Наманган каналига тушиб кетган.
Автомобиль ағдарилган вақтдаги куч ҳайдовчини машинадан улоқтириб юборган ва у воқеа жойида вафот этган. Шунингдек, машина салонида яна бир нафар аёл киши бўлган. У сув остида қолган машинадан хавфсиз чиқиб кетишга муваффақ бўлган.
Таъкидланишича, бир неча дақиқадан сўнг воқеа жойига Наманган вилояти Фавқулодда вазиятлар бошқармаси қутқарувчилари етиб келиб, тегишли амалий чоралар кўрилган. Жабрланувчи касалхонага етказган, машина махсус техникалар ёрдамида каналдан олиб чиқилган.
Эслатиб ўтамиз, август ойининг ўрталарида Самарқандда каналга тушиб кетган «Жигули» олиб чиқилган, бироқ унинг ҳайдовчиси салондан топилмаган эди. Июлда эса Тошкентда Lacetti Бўрижар каналига тушиб кетиши оқибатида ҳайдовчи воқеа жойида вафот этганди.
Изоҳ (0)