Йўл ҳаракати хавфсизлиги бош бошқармаси Сирдарё вилоятида авторейд вақтида телевидение тасвирчисига қўпол муомалада бўлиб, уни ҳақорат қилган ҳайдовчига қонуний чора кўрилганини маълум қилди.
Сирдарё вилояти Гулистон шаҳрида йўл ҳаракати қоидаларини қўпол равишда бузиб ҳаракатланаётган ҳайдовчиларни аниқлаш юзасидан ЙҲХБ ва ОАВ ҳамкорлигидаги авторейд тадбирида Ўзбекистон кўчаси бўйлаб ҳаракатланиб келган Lacetti ҳайдовчиси А.Б. хавфсизлик камарини тақмаганлиги учун тўхтатилган.
Ҳайдовчи видеотасвирчилар томонидан тасвирга олинаётганлигини кўриб, жазавага тушиб, ҳақоратли сўзлар билан тасвирчига таҳдид қилган. Тадбир қатнашчилари томонидан ҳайдовчини тинчлантиришга уринишлар бесамар кетган. Унга нисбатан йўл ҳаракати қоидасини бузганлиги учун белгиланган тартибда маъмурий баённома расмийлаштирилган.
А.Б.нинг тасвирчини ҳақорат қилгани ҳамда карантин вақтида тиббий ниқобни тақмаганлиги ҳолати юзасидан тегишли тартибда ҳужжатлар расмийлаштирилган. Гулистон шаҳар Маъмурий ишлар бўйича суди томонидан ҳужжатлар ўрганилиб, ҳуқуқбузар ҳайдовчига нисбатан 10 сутка маъмурий қамоқ жазоси тайинланди.
ЙХҲББ хабарида воқеанинг қачон бўлиб ўтганига аниқлик киритилмаган.
Аввал Оҳангаронда тўхтатилган ҳайдовчига «масхарабозлик қилган» ЙПХ ходимига нисбатан хизмат текшируви тайинлангани, Навоийда аёл киши ЙПХ ходимининг бодикамераси ва жезл таёқчасини олиб қўйгани, прокуратура ҳолат юзасидан суриштирув бошлагани, Самарқандда ЙПХ ходимининг қонуний талабларига бўйсунмаган 19 ёшли ҳайдовчи олти суткага, Оққўрғонда ЙПХ ходимининг погонини ва камерасини юлиб олган 3 йўловчи 15 суткага қамалгани ҳақида хабарлар берилган.
Изоҳ (0)