Тошкент вилояти Зангиота туманида 2020 йил 1 сентябрь куни «ЗИЛ» юк машинаси 11 ёшли болани уриб кетиб, йўл-транспорт ҳодисасини содир этган. Бу ҳақда Тошкент вилояти ички ишлар бош бошқармаси хабар берди.
Ҳодиса 2020 йил 1 сентябрь куни соат тахминан 12:30 ларда Зангиота тумани «Тарнов» маҳалласи ҳудуди ички автомобиль йўлида содир бўлган. А.А. бошқарувидаги «ЗИЛ» ўзига нисбатан қарама-қарши йўналишдан велосипед бошқариб келаётган 11 ёшли А.Ғ.ни юк машинасининг орқа ўнг ғилдираги билан туртиб юбориб, босиб ўтган.
Оқибатда вояга етмаган А.Ғ. олган тан жароҳатлари билан Республика шошилинч тиббий ёрдам илмий маркази шифохонасига ётқизилган. Жабрланувчига шифокорлар томонидан тиббий муолажалар кўрсатилиб, бола чап оёқ болдир соҳасидан реанимацион кесилиб, жонлантириш бўлимига ўтказилган.
Зангиота тумани ИИБ тергов тезкор гуруҳи шу куннинг ўзида ҳодиса жойига етиб борган ва ҳолат ўрганилиб, тегишли ҳужжатлар расмийлаштирилган.
Орадан 4 кун ўтиб, 5 сентябрь куни 2009 йилда туғилган А.Ғ. кўрсатилган тиббий муолажаларга қарамасдан шифохонада вафот этган.
Зангиота тумани ИИБ ҳузуридаги Тергов бўлими томонидан ўрнатилган тартибда марҳум А.Ғ.нинг ўлим сабаблари ва ундаги тан жароҳатларининг оғирлик даражасини аниқлаш борасида суд тиббий экспертизаси тайинланган.
Ҳолат юзасидан Зангиота тумани ИИБ ҳузуридаги Тергов бўлими томонидан 2020 йил 5 сентябрь куни Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, дастлабки тергов ҳаракатлари олиб борилмоқда. Натижаси бўйича қўшимча ахборот берилади, дейилади Тошкент вилояти ИИББ маълумотида.
Бундан аввал 8 сентябрь куни «Микрoфон кўтарган аёл» Telegram-канали муаллифи, журналист Азиза Қурбонова мазкур воқеа юзасидан пост қолдирганди.
1 сентябрь куни велосипедда кетаётган 11 ёшли Абдураҳмонни Зангиота тумани «Тарнов» маҳалласидаги катта автомобиль йўлида магазин олдидан чиқаётган Matiz туртиб юборади. Бола йиқилади. Тўғридан келаётган «ЗИЛ» юк машинаси эса болани...босиб кетади.Тошкент вилояти ички ишлар бош бошқармасининг расмий ахборотида Matiz’нинг 11 ёшли бола ўлимига сабаб бўлган мазкур ЙТҲ иштирокчиси бўлганлиги юзасидан маълумот келтирилмаган.Аввал Фарғонада 6 ёшли қиз юк машинаси уриб юбориш оқибатида вафот этгани, Самарқандда 19 ёшли ҳайдовчи Lacetti’да 7 ёшли болани уриб юборгани, бола воқеа жойида ҳалок бўлгани, Навоийда Tico ҳайдовчиси мактаб ўқувчисини уриб юборгани ҳақида хабарлар берилган.«ЗИЛ» ҳайдовчиси ва одамлар болани 16-болницага олиб боришади. Абдураҳмоннинг оёғини кесиб ташлашади, узоқ операция қилишади, бола 4 кун комада ётади. Болажон дардга дош беролмай жони узилади.
Айтишларича, «16»даги шифокорлар тартибга кўра, милицияга «запрос» беришган. Аммо 4 кун ичида ҳеч ким келмаган. Таниш-билиш қилиб, прокуратура жалб қилингач, терговчи бириктирилади. Боланинг жасадини олиб чиқиб кетиш учун судмедэкспертиза қилиш керак одатда. Судмедэкспертизага олиб бориш учун боланинг кесиб ташланган оёғи қидирилади (ҳа, тўғри ўқидингиз).
Моргданми-қаердандир оёқ топиб келингач, Зангиотадаги судмедэкспертизага олиб борайлик, ҳаммаси тайёр турибди, тез бўлади, дейди терговчи. Қўлида касаллик тарихини ҳам олиб кетади. Шу билан куни бўйи уни топиб бўлмайди, телефонини ўчириб олади. Минг дардига миллион дард қўшилиб, ота-онаси, яқинлари болани шомга ҳам чиқаришолмайди. Боланинг пажмурдаси билан вайрона судмедекспертизанинг эшигида сарсон бўлишади. Тунги 12 гача. Тасаввур қиляпсизми...
Шу билан бомдодга деб режа қилишади. Судмедэксперти йўқ, касаллик тарихи йўқлиги учун қабул қилинмайди. Яна каттароқ кимнидир топиб, ишга жалб қилиш учун эзилиш... Қўнғироқдан кейингина терговчи, эксперт топилади. Судмедэксперти ҳам ишига «астойдил киришиб» шундоқ ҳам 4 кун ичида аъзойи бадани операция бўлган болани яна қайта «титкилаб» чиқади...
Лаънатилар...айтинг, ўзи сиз қанақа одамсиз? Қанақа аблаҳ одамсизлар? Кетиб қолган Matiz’чи, «запрос»га келмаган Зангиота ҳуқуқ-тартибот органлари, вазиятни билиб туриб ҳам, қўлида «история»ни кўтариб кетиб, телефонини ўчириб олган терговчи, навбатчи топилмаган Зангиота Судмедэкспертиза хизмати – сизларнинг болангиз борми?, Яқинингиз борми?, Сизлар фақат тепадан қўнғироқ бўлса ишлайсизми?, Қотиб кетган бетингиз орқасида ақл, виджон борми?
Судмедэкспертиза хизматида умуман тартиб йўқлигини коронавируснинг биринчи тўлқинида бутун Тошкент кўриб бўлди, иши тушганларнинг дардидан тутун чиқади. Булар ўликни сотди ҳам, алмаштириб ҳам қўйди, қўлини теккизмай пакетга ўраб ҳам берди ва ҳоказо...
Норасиданинг мусибатидан адо бўлган ота-онани яна ўликни олиш учун ҳам шунча сарсон қилишга мослаштирилган қандай «тизим» ўзи бу? Қачонгача чидаймиз бу бошбошдоқликка, ўз ишига совуққонликка, инсон қадрига бефарқликка? Зангиота ИИБ, туман прокуратурасига ҳам шу савол.
Шундоқ жонга тегди шундай воқеаларни ўқиш, эшитиш, иштирокчиси бўлиш.
Абдураҳмон, болажоним, ҳечам хафа бўлма... Гуноҳлардан холи чин дунёга кетдинг. Бу одамлар билан яшаш ҳам осонмас, мен сенга айтсам...
«Микрoфон кўтарган аёл» Telegram-канали.
Изоҳ (0)