Бахтиёр Ашурматов: «Ўйин сўнгида эътиборни йўқотдик ва бу қимматга тушди»

Футбол бўйича Coca-Cola Суперлига 14-тури доирасида кечган «Бухоро» — «Қўқон-1912» учрашувидан (2:2) сўнг ҳар икки жамоа бош мураббийлари иштирокида матбуот анжумани бўлиб ўтди.

Дастлаб қўқонликлар бош мураббийи Бахтиёр Ашурматов ўз фикрлари билан ўртоқлашди.

Гапни очиғи, жуда аламли дуранг бўлди. Афсуски, ўйин охирида эътиборни йўқотдик ва бу хато бизга қимматга тушди. Майдонда сон жиҳатдан ҳам ўйин жиҳатидан ҳам устунлик қилаётгандик. Афсуски, футболда дақиқалар ва сониялар ҳам кўп нарсани ҳал қилади, ўйин охирида гол ўтказиб юбордик. Натижада жуда ҳам қимматли очколарни қўлдан бой бердик. Сабаби бизни яқин рақобатчиларимиздан бири бўлган «Насаф» жамоаси бу турда ғалаба қозонди. Биз ғалабани кўзлаган ҳолда майдонга тушгандик. Афсуски, дуранг натижа қайд этилди.

«Бухоро» жамоаси охиригача курашди ва ўзи учун қимматли очколарни қўлга киритди. Уларнинг ОКМК жамоаси билан ўйинини кўриб чиққандик. Улар ҳар бир ўйинда сўнгги жангга чиққандек ҳаракат қиляпти. Ҳар икки жамоа футболчиларига жанговар ўйин учун раҳмат айтаман.

Гапнинг очиғи, ўйин охирида гол урганимизда яна ғалаба қозонишимизга ишонаётгандим. Чунки, сўнгги учрашувларда айнан учрашув якунланиши арафасида йигитларимиз характер кўрсатиб, гол киритишаётган ва ғалаба қозонаётгандик. Бугун эса футболда олдиндан хурсанд бўлмаслик лозимлигини ўйин кўрсатиб берди. Футбол шундай ўйинки, сўнгги сонияларда ҳам барчаси ўзгариб кетиши мумкин.

Бахтиёр Ашурматов, «Қўқон-1912» бош мураббийи

Шундан кейин Бухоро шаҳри жамоаси устози Жамшид Саидов ўйин ҳақидаги фикрларини баён қилди.

Афсуски, ҳисоб 1:0 бўлиб турганида тезкор гол ўтказиб юбордик, жуда аламли бўлди. Умуман олганда йигитларга катта эътироз йўқ. Концентрацияни йўқотиб қўйдик ва гол ўтказиб юбордик. Футболчилар охиригача курашди ва ғалаба учун ҳаракат қилди.

Жамшид Саидов, «Бухоро» бош мураббийи