Ҳамма ҳам уйи озода ва тартибли бўлишини истайди. Лекин болали уйда ҳаммаси бошқачароқ бўлади. Мутахассислар фарзандни эрта ёшданоқ тартибга ўргатиш кераклигини таъкидлайди. «Домашний Очаг» журнали ишни нимадан бошлашни билмаётган ота-оналар учун фойдали тавсиялари билан бўлишади.
Мотивация беринг
Ота-онасининг мақтови ва мотивациясини яхши кўрмаган бола бўлмайди. Фарзандларингизнинг энг яхши мухлиси бўлинг, унутманг болани қўллаб-қувватлаш ўз мевасини бермай қолмайди. Иш чала бўлса битириб қўйиш ёки боланинг ўрнига бажаришдан тийилинг.
Ўйин тарзида амалга оширинг
Бола саранжомликка ўрганишини истасангиз, буни оддий ва қизиқарли йўллар билан ўйин тарзида амалга оширинг. Масалан, хона ўртасига саватча қўйиб, ўйинчоқларни ким биринчи олиб келиб саватга солиш ўйнанг.
Беркинмачоқ ўйнанг: болангиз шкафдаги кийимларни йиғиштирсин, сиз йўқолган кийимингиз қайси эканини топинг. Агар фарзандингиз икки ё учта бўлса, унда иш бажариш бўйича мусобақа уюштиринг. Беллашиш болаларда қизиқиш уйғотиши аниқ.
Мукофотлашни ҳам унутманг
Мукофот ва тақдирланишлар болалар яхши кўрган нарсалари орасида ўйиндан кейин иккинчи ўринда туради. Ҳар гал болангиз буюмларни жойига қўйганидан кейин янги ўйинчоқ бериш шарт эмас. Эсда қоларли, таассурот қолдирадиган рағбатлантириш тавсия қилинади. Масалан, фарзандингиз батутда сакрашни ёқтирадиган бўлса, айтилган вазифаларни бажарганидан кейин батут марказига олиб боришингизни таъкидланг ва сўзингиз устидан чиқинг. Агар гап, гаплигича қолиб кетса, биринчидан, сизга бўлган ишончи йўқолади, иккинчидан, иш ёки бошқа вазифаларни бажаришга хоҳиши бўлмайди.
Каттароқ ёшдаги болалар бажарган вазифаларни баҳолаш мумкин. Маълум баллни йиғганидан кейин у лойиқ бўлган мукофот билан тақдирланг.
Ишни қизиқ бажаришига шароит яратинг
Оддий юмушни, кичик саргузаштга айлантириш мумкин бўлган сценарий ўйлаб топинг. Масалан, ҳайвонот боғидан қочган айиқлар буюмларни ёйиб ташлаган. Нарсаларни йиғиб жойига келтириш орқали ҳайвонлар изига тушиш мумкин ва ҳакозо.
Танаффус эълон қилинг
Мусиқа энг яхши мотиватор ҳисобланади. Агар болангиз рақсга тушишни ёқтирса, вазифани яхши бажарганидан кейин мусиқий танаффус қилинг.
Вақт белгиланг
Болалар ўйинқароқликни яхши кўради ва энергияга тўла бўлади. Шу сабаб болангизга бирон ишни бажаришдан аввал вақтни белгилаш ва ким тез бажариш ўйнаш тавсия қилинади. Натижада ўйинга қизиққан бола сиз ўйлагандан ҳам тезроқ юмушларни бажариб қўяди.
Ҳисобла, ўйна, йиғиштир
Ушбу ўйинда сон танлашингиз керак бўлади. Танланган сонга қараб болангиз шунча миқдордаги ўйинчоқни жойига қўйиши керак. Бу ўйин орқали сиз ҳам биргаликда қувноқ вақт ўтказасиз, ҳам рақамлар билан мияни машқ қиласиз шу билан бирга хонани тозаланишига ҳам муваффақ бўласиз. Янада қизиқроқ бўлиши учун кейинги сафар сон ўрнига ранг ёки геометрик шакллар ҳамда буюмларнинг бошқа хусусиятларидан ҳам фойдаланса бўлади.
Изоҳ (0)