Андижон вилояти Жалақудуқ тумани ҳокими ўзгарди, дея хабар бермоқда «Дарё» мухбири. Халқ депутатлари туман кенгашининг 9 сентябрь куни бўлиб ўтган навбатдан ташқари сессиясида Ўзбекистон Ҳисоб палатаси шуъба мудири Ҳикматилло Латипов туман раҳбари сифатида таништирилган.
Туманга шу вақтгача расман Фурқат Бузруков ҳокимлик қилиб келаётган эди. Бузруков туманга 2020 йил 4 февраль куни раҳбар этиб тайинланган эди, бунгача у Андижон вилояти Халқ таълими бошқармаси бошлиғи бўлган. «Дарё» манбаси берган маълумотга кўра, Бузруков 1 августдан буён ишга чиқмаётган эди.
Маълумот учун, Ҳикматилло Латипов 1976 йилда Андижон вилояти Избоскан туманида туғилган. 1999 йилда Тошкент давлат университетини, 2001 йилда Ўзбекистон миллий университетини, 2012 йилда Давлат ва жамият қурилиши академияси қошидаги Олий бизнес мактабини тамомлаган.
У 2004—2013 йилларда Молия вазирлиги тизимида ишлаган, 2017 йилдан эса Ўзбекистон Ҳисоб палатасида иш бошлаган. У Жалақудуқ ҳокими этиб тайинлангунига қадар палатанинг қўшимча даромад манбаларини аниқлаш ва харажатларни таҳлил қилиш ахборот-таҳлил шў’баси мудири эди.
Аввалроқ, 9 сентябрь куни Андижон вилоятининг Асака ва Хўжаобод туманлари ҳокимлари ҳам алмашгани ҳақида хабар берилган эди.