Вазирлар Маҳкамасининг қарори билан Қишлоқ хўжалиги экинларини оқилона жойлаштириш тартиби тўғрисидаги низом тасдиқланди, дея хабар бермоқда Norma.
Ҳужжат Президентнинг 2019 йил 17 июндаги «Қишлоқ хўжалигида ер ва сув ресурсларидан самарали фойдаланиш чора-тадбирлари тўғрисида»ги ПФ-5742-сон фармонига мувофиқ ишлаб чиқилган.
Қайд этилишича, низом Президентнинг 2019 йил 17 июндаги ПФ-5742-сон фармони билан тасдиқланган Қишлоқ хўжалигида ер ва сув ресурсларидан самарали фойдаланиш концепцияси доирасида фойдаланишга киритилаётган ер майдонларига, деҳқон хўжаликлари, илмий-тадқиқот ташкилотлари, уларнинг филиаллари ва илмий тажриба станциялари ер майдонларига татбиқ этилмайди.
Низомга кўра, Қишлоқ хўжалиги, Сув хўжалиги, Иқтисодий тараққиёт ва камбағалликни қисқартириш вазирликлари, «Давергеодезкадастр»га қишлоқ хўжалиги экинлари жойлаштирилган майдонларнинг контурлар кесимидаги электрон хариталарини ишлаб чиқиш вазифаси топширилди.
Қорақалпоғистон Республикаси Вазирлар Кенгаши, вилоятлар ва туманлар ҳокимликларига ҳар йили 1 сентябрга қадар қишлоқ хўжалиги экинларини жойлаштириш натижаларига мувофиқ туманларни ва ҳудудларни (массивларни) ихтисослаштириш бўйича аниқ таклифларни Қишлоқ хўжалиги вазирлигига тақдим этиб бориш вазифаси топширилди.
Қишлоқ хўжалиги экинларини оқилона жойлаштириш қуйидагиларга асосланади:
- фермер хўжаликлари ва бошқа қишлоқ хўжалиги ташкилотларининг ихтисослашуви ва таклифлари;
- ички ва ташқи бозор талаблари;
- ҳудудларнинг табиий иқлим шароити ва сув билан таъминланганлик даражаси;
- суғориладиган ва лалми ер майдонларининг мелиоратив ҳолатини таҳлил қилиш.
Ҳужжат 2020 йил 25 августда кучга кирди.
Изоҳ (0)