«Ҳудудгазтаъминот» АЖ тизимидаги «Ҳудудгаз метрология» филиали, Давлат хавфсизлик хизмати Фарғона вилояти бошқармаси вакиллари билан биргаликда Фарғона вилоятида оҳак ва бошқа турдаги қурилиш материаллари, тўқимачилик маҳсулотлари ишлаб чиқарувчи корхоналар, шунингдек, автомобилларга ёқилғи қуйиш шохобчаларининг (АЁҚШ) текшируви ташкил этилди. Бу ҳақда Энергетика вазирлиги хабар берди.
Маълумотларга кўра, 10 кун давом этган ўрганишлар давомида вилоятдаги 15 та ишлаб чиқариш объектларида қўпол қонунбузарликлар ва 1 миллион 353 минг кубометрдан ортиқ газни ўғирлаш ҳамда газни ҳисобга олишдаги қонун бузилишлари билан боғлиқ қатор камчиликлар аниқланган.
Қайд этилишича, газ таъминоти корхоналарига етказилган зарар миқдори 1 миллиард 350 миллион сўмдан зиёдни ташкил этган.
Қонунбузарликлар бўйича барча материаллар ҳуқуқни муҳофаза қилиш идораларига топширилган. Бошқа ҳолатларни аниқлаш бўйича текширувлар эса давом этмоқда.
«Белгиланган тартибларни четлаб ўтиб, табиий газдан ноқонуний фойдаланилиши учун қулай шарт-шароитлар яратишда иштирок этган ‘Ҳудудгаз Фарғона’ ГТФнинг мансабдор шахсларига нисбатан, ‘Ҳудудгазтаъминот’ АЖ раҳбарияти томонидан амалдаги қонунчиликка мувофиқ жавобгарликка тортиш бўйича чоралар кўрилади», — дейилади хабарда.
Аввалроқ Қаршида газ тармоғига ноқонуний уланган ғишт заводи бюджетга салкам 400 миллион сўм зарар етказгани, ДХХ эса Самарқандда табиий газ ўғирлаш ҳолатларини аниқла тўғрисида хабар берилган эди.
Изоҳ (0)