Вазирлар Маҳкамасининг 2020 йил 24 августдаги «Атоқли адиблар ва мутафаккирларимиз ижодий меросини ёшлар ўртасида тарғиб қилиш ҳамда Адиблар хиёбонидан самарали фойдаланиш чора-тадбирлари тўғрисида»ги қарори қабул қилинган. Қарорга асосан Тошкент давлат юридик университети Ғафур Ғулом номидаги махсус стипендия ҳамда кўкрак нишонини таъсис этди, дея хабар бермоқда университет ахборот хизмати.
ТДЮУ Маънавият ва маърифат маркази раҳбари Шерзод Пўлатовнинг сўзларига кўра, йил давомида Ғафур Ғулом ижоди билан боғлиқ китоб ярмаркалари, янги асарлар тақдимотлари, бадиий ва ҳужжатли фильмлар намойиши, турли танловлар, фестиваллар, викториналар ўтказиш, адиб яшаган манзилларга илмий-маърифий экспедициялар уюштириш режалаштирилган.
2020/2021-ўқув йилидан Тошкент давлат юридик университетида таълим олаётган ёки ишлаётган бадиий ҳаваскор ёшлар танлов асосида «Илҳом» мукофотига ҳам тавсия этилади.
Маълум қилинишича, Ғафур Ғулом номидаги махсус стипендияга ҳар бир факультетдан бир нафардан талаба сазовор бўлиши мумкин. Номзодлар ўқиш ва ижодда фаол, китобхонлик тарғиботига муносиб ҳисса қўшаётган ёш қаламкашлар орасидан танлаб олинади. Стипендияни қўлга киритиш учун улар тест синовидан ўтиши керак.
Ғафур Ғулом номидаги кўкрак нишони билан нафақат ижодкор талабалар, балки ўқитувчиларни ҳам тақдирлаш кўзда тутилган. Бу ҳолда ғолибларга бир марталик пул мукофоти тақдим этилади.
Мавзуга доир:
- Президент «Мард ўғлон» давлат мукофоти ва «Меҳр-саховат» кўкрак нишони билан мукофотлаш тўғрисидаги ҳужжатларни имзолади
- Илк бор 18 нафар ёш ходим «Халқ таълими аълочиси» кўкрак нишони билан тақдирланди
- Андижонда ҳар ҳафтада туманлар ва ташкилотларнинг раҳбарларига «масъулиятли» ва «масъулиятсиз» нишонлари берилади
Изоҳ (0)