Ўзбекистон бош вазири Абдулла Арипов Тожикистонда Ўзбекистон ҳукумати маблағлари ҳисобига қурилган ва жиҳозланган умумтаълим мактабининг очилиш маросимига боради. Бу ҳақда Сўғд вилояти раҳбари администрациясидаги манбасига таяниб, Asia-Plus хабар берди.
Таъкидланишича, Абдулла Арипов бутун дунёда пандемия эълон қилинганидан кейин Тожикистонга ташриф буюрадиган биринчи юқори мартабали хорижий ҳукумат амалдори бўлади.
Сўғд вилояти Спитамен туманида 640 ўқувчига мўлжалланган мактаб қурилди. Уни қуриш тўғрисидаги битим Ўзбекистон Президенти Шавкат Мирзиёевнинг 2018 йил март ойида Тожикистонга давлат ташрифи чоғида имзоланган.
Тантанали маросим санаси дипломатик каналлар орқали тасдиқланади.
Сўғд вилояти Спитамен туманида мактаб қурилишидан ташқари, Ўзбекистон томони Хатлон вилояти Кубодиён туманида 200 ўринли шифохона ҳам қурмоқда.
2018 йилда Тожикистон Самарқанд шаҳрида 640 ўқувчига мўлжалланган мактаб биноси қуриши ҳақида маълум қилганди. Шунингдек, Тожикистон томони Фарғона вилоятида битта мактабгача тарбия муассасаси қуришни режалаштирган.
Изоҳ (0)