Коронавирусга чалинмайман, деб ҳеч ким кафолат бера олмайди. Бу ҳақда Ўзбекистон давлат бош санитария инспектори, профессор Нурмат Отабеков «Шифобахшуз» Telegram каналига берган интервьюсида айтиб ўтди.
Фото: «Дарё»
Суҳбат чоғида Нурмат Отабеков коронавирусни қандай қилиб юқтириб олганини маълум қилди.
«Мен тўрт ой бадалига ўзимни эҳтиёт қилдим. Республика санитария-эпидемиология осойишталиги агентлиги биносида бевосита фаолият юритганимиз боис, қолаверса, у ерда бир неча ўнлаб касалликка чалинган ходимлар рўйхатга олинганлиги туфайли мулоқот орқали касалликни юқтириб олдим. Ўз саломатлигимга эътиборсизлик қилмасдан, ҳушёр бўлганлигим сабабли касаллик бошланиш давридаёқ аниқланди. Бу эса ўз йўлида жиддий асоратларсиз даволаниб кетиш имкониятини берди. Шунинг учун биз ҳаммамиз ўз соғлиғимизга масъулият билан ёндашишимиз керак деб ўйлайман», – деди профессор.
Давлат бош санитария инспекторининг алоҳида таъкидлашича, атрофда шундай касаллик қўзғатувчиси бор экан, касалликка чалинмайман, деб ҳеч ким кафолат бера олмайди.
«Шундай экан, кимки бу дардга чалинган бўлса, ҳаммаси шифо топишига умидворман ва шундай ният қилиб қоламан. Фақат бу касалликни енгиш учун одамда ички бир ишонч, хоҳиш, интилиш ва ирода бўлиши керак. Қачонки одам тушкунликка тушар, ғамга ботар ва курашмас экан, ушбу шахс мазкур касалликдан енгилиши мумкин. Шунинг учун яхши, ижобий кайфиятнинг ҳукм суриши, тўйимли овқатланиш, тузалиб кетишга бўлган интилиш ва хоҳишнинг мавжудлиги – касалликдан эллик фоиз тузалишга имконият яратилди дегани. Негаки, мен шифохонада даволаниш пайтида касалликни енга олмай, тушкунликка тушиб, ҳаракат қилмасдан, интилмасдан, касаллик олдида ожизлигини кўрсатиб, тиббиёт ходимларининг тавсияларига қулоқ тутмасдан аҳволи оғирлашиб қолган, ҳатто ҳаётдан кўз юмган одамларни ҳам кўрдим», – деди мутахассис.
Аввалроқ, Нурмат Отабеков коронавирусдан даволаниб чиққанидан сўнг ўзида кечирган ҳолатлар ҳақида маълумот берган эди.
Изоҳ (0)