Оммавий равишда масофадан ишлашга ўтиш самарали натижа бермаяпти ва ғояларни муҳокама қилишда қийинчилик туғдирмоқда. Бу ҳақда Netflix раҳбари Рид Хастингс The Wall Street Journal’га берган интервьюсида маълум қилди.
«Мен ижобий натижаларни кўрмаяпман. Имкониятнинг йўқлиги шахсий учрашувларни юзага келтирмоқда, айниқса, халқаро даражада — бу ҳақиқий минус», — дейди Хастингс.
Компания ўз ходимларини қачон офисларга қайтаришни режалаштираётгани тўғрисидаги саволга топ-менежер ҳазил билан жавоб қайтарган: «Вакцина тасдиқланганидан 12 соат ўтиб».
Аслини олганда Netflix дори воситаси чиққанидан ярим йил ўтиб ходимларини қайтаришни режа қилмоқда. Компания раҳбарининг тахминича, офисга қайтилганидан сўнг иш режими ўзгаради: тўрт кун офисда ва бир кун уйда ишлаш одатдаги беш кунлик иш ўрнини эгаллайди. Хастингс бу каби моделдан бошқа компаниялар ҳам фойдаланишини тахмин қилмоқда.
Бошқа технологик компаниялар эса ходимлар ҳеч қачон офисга қайтмаслигини башорат қилмоқда. Масалан, Twitter ўз ишчиларини майдаёқ «абадий масофадан ишлашга» жўнатиб юборган. Fujitsu эса ходимларига мунтазам масофадан ишлашга рухсат беришни режалаштирмоқда. Facebook ва Google ўз ходимлари камида йил охирига бориб офисга қайтишлари мумкинлигини билдирган. Apple раҳбари ҳам ишчиларга уйдан ишлашга рухсат бергани, Японияда давлат идораларига ходимларини уй шароитида ишлашга ўтказиш буюрилгани хабар берилганди.
Netflix стриминг сервисининг бутун дунё бўйлаб 200 миллион фойдаланувчиси бор. Компания пандемия сабаб тўхтаб қолган ўз сериалларини, ҳужжатли ва бадиий фильмларини яратишни яна бошлаган. Топ-менежернинг сўзларига кўра, Netflix лойиҳалари Европа ва Осиёда ишлаб чиқарилади, айримлари эса — Лос-Анжелесда.
Изоҳ (0)