Жанубий Кореянинг Samsung компанияси ўзининг фармацевтика соҳасидаги бизнесини кенгайтиришда давом этади. Компания дунёдаги энг катта фармацевтика заводи бўладиган корхонани қуриш учун 2 миллиард доллар инвестиция киритади. Қурилиш ишларини 2022 йилда якунлаш режалаштирилмоқда. Бу ҳақда «Интерфакс» хабар берди.
Маълум қилинишича, компания коронавирус инфекцияси билан боғлиқ соҳалардаги ўзгаришлар сабабли биологик дори воситалари бозорида ривожланишни кўзламоқда.
Super Plant номини олган завод Samsung компаниясининг биофармацевтик бўлими бўлган Samsung BioLogics Cо., компаниясининг тўртинчи заводи бўлади. Унинг майдони тахминан 230 минг квадрат метрни ташкил этади. Шу тариқа завод компаниянинг мавжуд учта заводининг умумий ҳудудидан каттароқ майдонни эгаллайди ва ҳатто ўлчами жиҳатдан Париждаги Лувр музейидан бироз катта бўлади.
Samsung компаниясининг мақсади — COVID-19 пандемияси сабабли юзага келган талаб ўсишидан фойдаланиб қолиш. Samsung BioLogics дунёдаги энг йирик фармацевтик компаниялар учун препаратлар ишлаб чиқариш билан шуғулланади.
Samsung BioLogics раҳбарининг маълум қилишича, дастлаб заводнинг анча кичик бўлиши режалаштирилганди, бироқ коронавирус пандемияси маҳсулотларнинг янги тури — COVID-19’ни даволаш учун воситаларни яратди ҳамда дори яратувчилар ва ҳукуматларни янги ишлаб чиқариш манбаларини излашга чорлади.
Изоҳ (0)