Чехия терма жамоаси Миллатлар Лигаси доирасида Шотландияга қарши кечадиган ўйинга янги таркиб йиғди. Чехия футбол федерациясининг хабарига кўра, мазкур учрашув ўз вақтида ўтказилади.
Аввалроқ Чехия футбол федерацияси мамлакатда юзага келган коронавируснинг янги тўлқини сабаб барча футболчиларга жавоб бериб юборгани хабар қилинганди. Шу сабаб федерация буткул бошқа таркибни йиғишга мажбур бўлди.
Таркибга чақирилган 24 футболчидан 22 нафари дебютант ҳисобланади. Аввалроқ фақат 36 ёшли ҳимоячи Роман Губник ва 30 ёшли Станислав Тецл терма жамоада тўп сурган. Губник сўнгги бор тўрт йил аввал терма жамоадан чақирув олган бўлса, Тецл 2018 йилдан бери жалб қилинмаётган эди. Таркибга чақирилган 17 ёшли ярим ҳимоячи Адам Карабек Чехия терма жамоасининг энг ёш дебютантига айланиши мумкин.
Чехия ва Шотландия терма жамоалари ўртасидаги ўйин 7 сентябрь куни бўлиб ўтади.
Эслатиб ўтамиз, УЕФА коронавирус пандемияси даврида ўйинларни ўтказиш борасида ўз регламентини эълон қилганди. Унга кўра, ҳар бир мезбон терма жамоа ўйинни ўтказиш вазифасини ўз бўйнига олиши белгиланган. Чехия ушбу ўйинни қолдирадиган бўлса, бу катта эҳтимол билан техник мағлубиятга олиб борарди. Сабаби тиғиз тақвим сабаб учрашувни қолдириш жуда қийин масала эди. Ўйин бекор бўладиган бўлса, мезбон жамоага техник мағлубият ёзилиши, бу икки марта қайтарилса жамоа мусобақадан четлатилиши белгиланганди.
Гуруҳ босқичининг биринчи учрашувида Чехия терма жамоаси Словакияни мағлуб этган бўлса (3:1), Шотландия Исроил билан муроса йўлини танлаган (1:1).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)