Суперлиганинг биринчи давра рамзий терма жамоаси эълон қилинди

Футбол бўйича Coca-Cola Суперлиганинг биринчи давраси ўз якунига етди. Ортда қолган 13 тур давомида эса кўплаб футболчилар ажойиб ўйинлар ўтказиб, ўзини яхши томондан кўрсатишга эришди. Профессионал футбол Лигаси (ПФЛ) мана шундай футболчилардан иборат рамзий терма жамоа тузди.

Дарвозабон:

Ўткир Юсупов – («Навбаҳор»)

Дарвозага берилган аниқ зарбаларни қайтариш: Битта ўйинда ўртача 4.8 та зарба – 83%.

Жамоа барқарор ўйин намойиш эта олмаётган бўлса-да, Ўткир Юсупов мавсумни юқори савияда ўтказмоқда. Мавсум бошидан то ҳозиргача жамоанинг энг яхши ўйинчиси бўлиб турибди. Юсупов биринчи даврада энг кўп сейв амалга оширди ва ушбу бошқа дарвозабонлар орасида етакчи бўлиб турибди.

Ҳимоячилар:

Мурод Холмуҳаммедов – ўнг қанот ҳимоячиси («Қўқон-1912»)

8 та гол , 3 та ассист

Мурод Холмуҳаммедов ўз амплуасида ҳозирча Ўзбекистон чемпионатида жамоасига энг кўп фойда келтираётган футболчи ҳисобланади. Қанот ҳимоячиси бўлишига қарамай, рақиб дарвозаси олдида асосий хавф айнан Мурод томонидан амалга оширилади. Бурчак тўплари, аутлар, стандарт вазиятлар, жарима тўплари ва пенальти — буларнинг барчаси Холмуҳаммедов томонидан амалга оширилади. Шунингдек, жамоанинг асосий тўпурари ва ассистенти ҳам айнан Мурод Холмуҳаммедов.

Ойбек Рустамов – марказий ҳимоячи («Қўқон-1912»)

Яккакурашлар: Ўртача бир ўйинда 19 та – 58%

Рақиб ҳужумини бартараф этишда чемпионатнинг энг яхши ҳимоячиларидан бири айнан Рустамовдир. Тўпни рақибдан олиб қўйиш, ҳимоядаги яккакурашларда унинг статистик кўрсаткичлари бошқа ҳимоячилар билан таққослаганда ажойиб кўрсаткичларга эга.

Нажмиддин Нормуродов – марказий ҳимоячи («Машъал»)

Яккакурашлар: Бир ўйинда ўртача 14 та – 63%

«Машъал» айни дамда чемпионатнинг энг тартибли жамоаларидан бири ва тартибли жамоанинг асосий ютуғи — тартибли ҳимоядир. Нажмиддин Нормуродов жамоанинг асосий марказий ҳимоячиси ҳамда яккакурашларда бошқа жамоадошларидан яхшироқ кўрсатгичга эга. Буни статистика ҳам тасдиқлаши мумкин.

Мурод Тошматов – чап қанот ҳимоячиси (ОКМК)

1 та гол, 5 та ассист

Мурод Тошматов – энг кўп кросслар амалга оширадиган, ўйин давомида барчадан кўпроқ югурадиган ва қанотдан рақиб жамоаси дарвозасига энг кўп хавф соладиган футболчидир. Унинг кросслари аллақачон ОКМКнинг дастхатига айланиб улгурган. Майдонни яхши кўра оладиган, рақиб дарвозаси томон аниқ пас узатадиган ҳимоячи ҳозирда чемпионатнинг энг яхши қанот футболчиларидан бири бўлиб турибди.

Ярим ҳимоячилар:

Ёван Жокич – таянч ярим ҳимоячиси (ОКМК)

3 та гол, 1 та ассист

Сербиялик футболчи рақиб ҳужумини тўхтатишда чемпионатда тенгсиз футболчилардан бири саналади. Шунингдек, футболчи ОКМКнинг ҳимоя ва ҳужум чизиғини боғлаб берувчи энг асосий фигурадир. Аниқроқ айтганда, ОКМКнинг бугунги ўйин услубини белгилаб берувчи футболчи.

Жалолиддин Машарипов – қанот ярим ҳимоячиси («Пахтакор»)

2 та гол, 7 та ассист

Ушбу футболчи ҳақида фақатгина битта таъриф бериш мумкин — биринчи давранинг энг яхши футболчиси.

Ойбек Бозоров – марказий ярим ҳимоячи («Насаф»)

Дриблинглар: Ўртача бир учрашувда – 7 та – 62% муваффақиятли амалга оширилган

«Насаф»нинг ёрқин ўйинлари асосан жамоанинг ажойиб бўлган ярим ҳимоя чизиғи билан боғлиқ. Қаршиликлар чемпионатда энг тезкор футболчиларга эга жамоа саналади. Асосий қурол эса – Ойбек Бозоров. Тезкор, ажойиб техника соҳиби ва жозибали дриблингга эга футболчи чемпионатнинг айни дамдаги энг ёрқин футболчиларидан биридир.

Нурилло Тўхтасинов – қанот ярим ҳимоячи («Бунёдкор»)

4 та гол, 1 та пас

«Бунёдкор ҳозирда биринчи давра якунларига кўра энг ҳужумкор жамоалардан бири. Қувноқ ва ностабил жамоа бўлса-да, «Бунёдкор» истеъдодли футболчилари билан мақтана олади. Бу мавсумда Нурилло Тўхтасинов жамоада бошқалардан ажралиб турибди. Муҳим голлар уриб, «қалдирғочлар»га кўп ҳолларда ёрдам бермоқда.

Ҳужумчилар:

Драган Черан – ҳужумчи («Пахтакор»)

13 та гол

Аввалги мавсум тўпурари ушбу мавсумда ҳам гол уришдан тўхтамаяпти ва 13 та гол билан ҳозирча чемпионат тўпурари бўлиб турибди.

Игор Сергеев – ҳужумчи («Пахтакор»)

10 та гол

Битта жамоадан икки ҳужумчининг рамзий терма жамоага кириши ғалати ҳолат. Аммо «Пахтакор» сафида Игор Сергеев яна аввалги биз билган Игор Сергеев сифатида порламоқда. Меҳнаткаш, астойдил тер тўкадиган ҳужумчини Арвеладзе қайтадан кашф қилди. Игор Сергеев рамзий терма жамоага ҳақли футболчи эканини исботлади ва бу унинг меҳнати самарасидир.