Фарғона вилоятида прокуратура органлари томонидан ўтказилган назорат тадбирлари давомида озиқ-овқат маҳсулотлари ҳамда дори-дармон воситалари нархини оширган 156 нафар, карантин чекловларига амал қилмаган 65 минг 82 нафар шахс маъмурий жавобгарликка тортилган. 7 та қўпол қонун бузилишига нисбатан жиноят иши қўзғатилган. Бу ҳақда «Дарё» мухбири хабар берди.
Қайд этилишича, вилоятда соғлиқни сақлаш тўғрисидаги қонун ҳужжатлари ижроси юзасидан ўтказилган текширишлар давомида қонун бузилиши, унинг келиб чиқиш сабабларини бартараф этиш тўғрисида 58 та тақдимнома киритилган. 151 нафар мансабдор шахс интизомий, 9 нафари маъмурий жавобгарликка тортилган, қўпол қонун бузилишлар юзасидан 18 та жиноят иши қўзғатилган, 132 нафар шахснинг бузилган ҳуқуқлари тикланган.
Таъкидланишича, вилоятда прокуратура органларининг бевосита ташаббуси билан Фарғона шаҳридаги ҳамда Фурқат, Риштон, Бешариқ, Фарғона туманларидаги 7 та тез ёрдам бўлимлари биносида қурилиш-таъмирлаш ва жиҳозлаш ишлари олиб борилган. Тез ёрдам станцияларининг моддий-техник базасини мустаҳкамлаш мақсадида 20 та янги тез тиббий ёрдам машиналари харид қилинган.
Аҳоли соғлиғини профилактика қилиш ва даволаш учун 10 миллиард сўм маблағ ажратилиб, 21 турдаги дори воситаларининг 3 ойлик захираси яратилган.
Бундан ташқари, тез ёрдам машиналарини радиоалоқа билан тўлиқ таъминлаш учун 1 миллиард 300 миллион сўм маблағ ажратилган.
Изоҳ (0)