Ўзбекистонда етиштирилаётган мева-сабзавот маҳсулотлари Буюк Британияга экспорт қилиниши кутилмоқда. Бу ҳақда «Ўздавкарантин» инспекцияси матбуот хизмати раҳбари Дурдона Очиловага таяниб, «Kun.uz» хабар қилган.
Хабарга кўра 3 сентябрь куни «Ўздавкарантин» ҳамда Буюк Британия атроф-муҳит, озиқ-овқат ва қишлоқ хўжалиги вазирлиги (DEFRA) вакиллари иштирокида видеоконференция тарзида мулоқот ўтказилган.
Мулоқотда фитосанитария соҳасида ўзаро манфаатли ҳамкорлик масалалари муҳокама қилинган.
«Видеоконференция доирасида Ўзбекистон қишлоқ хўжалиги маҳсулотларини Буюк Британия бозорларига олиб кириш учун қўшимча фитосанитария рухсатномаларини бериш ва инспекциянинг илмий салоҳиятини мустаҳкамлаш бўйича музокаралар олиб борилди.
Таъкидлаш керакки, Буюк Британия томони Ўзбекистонда фитосанитария соҳасида олиб борилаётган ислоҳотларни ижобий баҳолади. Хусусан, сўнгги йилларда бу соҳада эришилаётган натижаларга тўхталиб, Ўзбекистоннинг Халқаро ўсимликларни ҳимоя қилиш конвенциясига қўшилиши, миллий стандартларни халқаро стандартлар билан уйғунлаштирилгани ва бу орқали мамлакатда ўсимликлар карантини соҳасининг янги босқичга кўтарилгани алоҳида қайд этилди», – дейилади «Ўздавкарантин» хабарида.
Онлайн мулоқот якунида британиялик мутахассисларнинг Ўзбекистонда қўлланиладиган фитосанитария чоралари бўйича тақдим этилган маълумотларни ўрганиш натижаларига кўра, анор, гилос, олхўри, нектарин, шафтоли, хурмо, олма, нок, узум, лимон, аччиқ қалампир ва помидор каби жами 12 та маҳсулотни Буюк Британия бозорларига экспорт қилиш мумкинлиги айтилган.
Маълумот учун, ҳар бир экспортёр Ўзбекистон маҳсулотларини Буюк Британияга олиб кириш учун REASN – Буюк Британия боғдорчилик инспекцияси веб-сайтида рўйхатдан ўтиши талаб этилади.
Музокаралар якунида Ўзбекистон ҳудудларида ўсимликлар карантини лабораторияларини ташкил этиш учун грантлар ажратилиши масалалари ҳам кўриб чиқилган. Бундан ташқари, илмий фитосанитария соҳасида ҳам икки томонлама манфаатли ҳамкорликни йўлга қўйиш келишиб олинган.
2019 йил ноябрь ойида Ўзбекистоннинг Хитойга 12 турдаги қишлоқ хўжалиги маҳсулоти экспортига рухсат олишга эришгани, қўшимча равишда 15 та маҳсулотлар экспортига рухсат олиш бўйича музокаралар давом этаётгани ҳақида хабар берилганди. 2020 йилнинг апрель ойида Ўзбекистонда экспорт ҳажмини ошириш мақсадида Ҳиндистонга 37 хил, Жанубий Кореяга 36 хил, Японияга 64 хил, Хитойга 14 хил мева-сабзавотларни экспорт қилишга рухсат олинди. Бундан ташқари, мазкур мамлакатларга яна 56 хил маҳсулот экспортини йўлга қўйиш бўйича музокаралар олиб борилаётгани маълум қилинган.
Изоҳ (0)