Ветеринария ва чорвачиликни ривожлантириш давлат қўмитаси дайди мушуклар кўпқаватли уйларда бургалар пайдо бўлишига сабаб бўлиш-бўлмаслигига аниқлик киритди. Қўмита томонидан тушунтириш «Меҳр ва оқибат» ҳайвонларни ҳимоя қилиш жамияти сўровига биноан берилган.
Мутахассисларга мурожаат қилишга кўпқаватли уйлар аҳолиси ўртасидаги баҳслар сабаб бўлган. Уларнинг айримлари мушуклар кўпқаватли уйлар подъезди ва ертўласида бургалар пайдо бўлишига сабаб бўлади, деган фикрда. Шу сабабли ҳайвонларни шафқатсизларча йўқ қилмоқда.
Ветеринария ва чорвачиликни ривожлантириш давлат қўмитаси «Меҳр ва Оқибат» жамиятининг мурожаатига жавобан расмий хат юборган. Унда қайд этилишича, жавоб хати ветеринария бўлими ходимларининг кўп йиллик тажрибаси ва илмий изланишларига таянган ҳолда тузилган.
Қўмитанинг билдиришича, ертўла бургалари каби майда паразитлар пайдо бўлиши ва кўпайишига кўча мушуклари ёки итлар эмас, ертўладан фойдаланишда санитария меъёрларига риоя қилмаслик, бургалар кўпайишига қулай шароит яратувчи намлик ва ахлат босиши сабаб бўлади.
«Юқорида айтиб ўтилган кўча мушуклари ва итлари фақат уларнинг ташувчиси бўлиши мумкин холос», — дейилади жавоб хатида.
Қўмита, шунингдек, уйлардаги паразитларга қарши кураш бўйича тавсиялар ҳам берган. Мутахассисларнинг фикрича, кўча ҳайвонларини ўлдириш ўрнига ертўладаги бургалар яшаш муҳитини ўзгартириш лозим. Бунинг учун ертўлаларни дезинфекция қилиш бўйича профилактик чоралар кўриш, уларни чиқиндилардан тозалаш ҳамда озодалик ва тартибни сақлаш лозим.
Изоҳ (0)