Россия ва Хитой соғлиқни сақлаш манфаатларини ҳисобга олмай, ўзининг сиёсий қарашларидан келиб чиқиб коронавирусга қарши вакцинани яратишда шошилди. Бу ҳақда АҚШ давлат котиби Майкл Помпео маълум қилди, деб хабар беради «Korrespondent.net».
«Биз руслар ва хитойликлар ушбу вакциналарни тиббиётдаги ютуқлар сифатида эмас, балки сиёсий, дипломатик манфаатлар йўлида бозорга чиқаришга шошилганини кўриб турибмиз. Бу дунёнинг биринчи даражали манфаатларига тўғри келмайди», — дейди Помпео.
Россия ва Хитой вакциналарига бўлган ишонч ҳақида гапирар экан, АҚШ давлат котиби «ишон, лекин текшириб кўр» принципига амалга қилишини билдирган. Помпеонинг сўзларига кўра, бозорда самарасиз бўлган вакциналарнинг пайдо бўлиши янги муаммоларни юзага келтиради.
«Фойда бермайдиган вакцинани қўлга киритсак, бу янада кўпроқ кулфат келтириб, бундан кўп инсонларнинг ўлимига олиб келиши мумкин», — дея таъкидлайди АҚШ давлат котиби.
Аввалроқ Интеллектуал мулк ишлари бўйича Хитой давлат бошқармаси COVID-19 коронавирус инфекциясига қарши вакцинага биринчи патентни бергани маълум қилинганди. Июнь ойида мазкур вакцинадан ҳарбий мақсадларда фойдаланишга рухсат олинганди. Хитой томонидан яратилган вакцина 2020 йил декабрь ойи охирларида 144 доллардан сотувга чиқиши кутилмоқда.
Июль ойининг охирида эса Ўзбекистоннинг Хитойдаги элчиси Бахтиёр Саидов ва Sinopharm Group компанияси раҳбари Лю Сзинчжен билан бўлиб ўтган учрашувда клиник синовларнинг учинчи фазасини Ўзбекистонда ўтказиш масаласи кўтарилган. Sinopharm Group таркибидан Хитой миллий биотехника гуруҳи ўрин олган.
Эслатиб ўтамиз, Россиянинг Гамалея институти томонидан яратилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олган. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади.
Изоҳ (0)