Коронавирусга қарши ҳар қандай вакцина халқаро даражада фойдаланилишидан олдин унинг хавфсизлиги ва самарадорлигини тасдиқловчи тўлиқ жараёндан ўтиши керак. Бу ҳақда Жаҳон соғлиқни сақлаш ташкилоти бош илмий ходими Сумия Сваминатан 4 сентябрь куни ўтказилган брифингда маълум қилди, деб хабар беради «РИА Новости».
«Бирор-бир вакцина регуляторлар, ҳукумат ва ЖССТ унинг хавфсизлик стандартларига минимал жавоб беришига ишончи комил бўлмагунига қадар оммавий равишда тарқатилмаслиги керак», — дейди Сваминатан.
Унинг сўзларига кўра, маъқулланган вакциналарни илк етказиб бериш ишлари ЖССТнинг COVAX дастури орқали 2021 йилнинг ўрталарида бошланиши мумкин.
24 август куни Женевада бўлиб ўтган брифингда ЖССТ раҳбари Тедрос Гебрейесус коронавирусга қарши вакцина ишлаб чиқиш ва тарқатиш бўйича COVAX халқаро механизмига 172 давлат қўшилгани ҳақида хабар берганди. ЖССТ ва унинг Европа минтақавий бюросининг фаол аъзоси сифатида Ўзбекистон ҳам ташкилотнинг коронавирусга қарши эмлаш дастурига қўшилди. Айни пайтда ЖССТ портфелида коронавирусга қарши 9 та вакцина мавжуд экани айтилмоқда.
Аввалроқ вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтганди. Кейинчалик Россияда хавф гуруҳига кирувчи кишиларни коронавирусга қарши оммавий эмлаш 2020 йилнинг ноябрь—декабрь ойларида бошланиши ҳақида хабар берилди.
Изоҳ (0)