Германия, Франция ва Италия баҳсли президент сайловлари туфайли Александр Лукашенкога қарши санкциялар жорий этилишига қарши чиқди. Болтиқбўйи давлатлари ва Польша эса унга қарши санкцияларни талаб қилмоқда. Meduza’нинг ёзишича, бу ҳақда дипломатик манбаларга таяниб, Германиянинг Die Welt газетаси хабар берди.
Германия ва Франция расмийлари Лукашенкога қарши санкциялар қўлланилса, Минск билан мулоқот бутунлай тўхтайди, деган фикрда.
Манбанинг хабар беришича, Европа Иттифоқи мамлакатлари Лукашенкони санкциялар рўйхатига киритиш масаласида ҳали расман овоз бермаган, аммо бу борадаги музокаралар якдил хулоса билан якунланди.
19 август куни Европа Иттифоқи давлатлари раҳбарлари Беларусдаги сайлов натижаларини тан олишдан бош тортди ва мамлакат раҳбариятига шахсий санкцияларни қўллашга ваъда берди.
31 август куни Латвия, Литва ва Эстония Александр Лукашенко ва яна 29 нафар беларуслик мансабдорга нисбатан санкция жорий қилди.
2011—2016 йилларда Александр Лукашенко ва Беларуснинг яна 169 нафар расмий шахслари Европа Иттифоқи санкцияси остида бўлган. Улар 2010 йил декабрь ойида Беларусда бўлиб ўтган президент сайловларидаги манипуляция ва ўша пайтда амалга оширилган ҳибсга олишлар туфайли қора рўйхатга киритилган.
Ҳозирда қурол-яроғ ва ускуналар етказиб беришга қўйилган эмбарго ва Лукашенконинг сиёсий мухолифларини ўғирлашда ва қотилликда иштирок этган хавфсизлик хизматининг тўрт нафар ходимига қарши санкциялар ўз кучида қолмоқда.
Изоҳ (0)