Вазирлар Маҳкамасининг «Илҳом» мукофотини таъсис этиш тўғрисида»ги 503-сонли қарори қабул қилинди, деб ёзади Norma.
Қарор билан Олий ва ўрта махсус таълим вазирлиги (ОЎМТВ), Маданият вазирлиги, Республика Маънавият ва маърифат маркази ҳамда Ўзбекистон Ёзувчилар уюшмасининг «Илҳом» мукофотини таъсис этиш тўғрисидаги таклифи маъқулланди.
Ҳужжат билан қуйидагилар тасдиқланди:
- «Илҳом» мукофоти танловига тайёргарлик кўриш ва уни ўтказиш бўйича ташкилий қўмита таркиби;
- мукофот учун танлов ўтказиш қоидалари ва шартлари, ташкил этиш ҳамда ўтказиш, мукофотни топшириш ва молиялаштириш тартибини назарда тутувчи «Илҳом» мукофоти билан тақдирлаш тартиби тўғрисидаги низом.
- мукофот шоир ва ёзувчилар ҳаёти ҳамда ижодини ўрганиш, уларнинг асарларини таржима қилиш, шу асосда тадқиқотлар ўтказиш, кино ва саҳна асарлари яратиш каби маънавий-маърифий, илмий-ижодий жараёнларда энг юқори натижаларга эришган олий таълим муассасаларида таҳсил олаётган ҳамда фаолият юритаётган ёшларга берилади;
- мукофот учун танловни ўтказишга ОЎМТВ масъул ҳисобланади, ИИВ, Миллий гвардия, Маданият вазирлиги, Ёшлар ишлари агентлиги, «Ўзбеккино» Миллий агентлиги, Маънавият ва маърифат маркази, Ёзувчилар уюшмаси ҳамда Ўзбекистон Бадиий академияси ҳамкор вазирлик ва идоралар этиб белгиланди;
- мукофот билан тақдирлаш ҳар йили 20 май – Адиблар хиёбони очилган кунда «Катта адабиёт байрами» ҳафталиги доирасида амалга оширилади;
- танлов ғолибларига махсус диплом ва статуэткадан ташқари қуйидаги мукофотлар топширилади:
- 1-ўрин учун – Spark автомобили;
- 2-ўрин учун – 30 миллион сўм пул мукофоти;
- 3-ўрин учун – 15 миллион сўм пул мукофоти.
Ўзбекистон Бадиий академиясига ОЎМТВ буюртмасига биноан мукофот статуэткаси эскизи лойиҳасини уч ой муддатда ишлаб чиқиш ҳамда тасдиқлаш учун Ташкилий қўмитага киритиш топширилди.
Мукофотларни тайёрлаш ва ғолибларни тақдирлаш маросимини ўтказиш билан боғлиқ харажатлар ОЎМТВнинг Олий таълим муассасаларини ривожлантириш жамғармаси маблағлари ҳисобидан амалга оширилади.
Низомда қуйидагилар қайд этилган:
- танловнинг дастлабки саралаш босқичини ташкил этиш ва ўтказиш тартиби;
- танловнинг асосий босқичи ғолибларини аниқлаш ва баҳолаш тартиби;
- мукофотни топшириш, танловни ташкил этиш ва ўтказишни молиялаштириш тартиби.
Изоҳ (0)