Маданият вазирлиги коронавирусдан вафот этган айрим санъаткорларнинг исмини эълон қилди. Уларнинг икки нафари ССВ рўйхатида йўқ

Ўзбекистон маданият вазирлиги коронавирус асоратлари оқибатида оламдан ўтган санъаткорлар ҳақида маълумот берди.

Минг афсуски, бу касаллик туфайли кўпгина юртдошларимиз қаторида элимиз севган, истеъдодли санъаткорларни ҳам сўнгги йўлга кузатишга мажбур бўлдик.

Бугун биз ўзининг ўлмас образлари билан халқимиз қалбидан мустаҳкам жой олган Ўзбекистон халқ артисти Дилбар Икромова, машҳур композитор ва дирижёр, Ўзбекистонда хизмат кўрсатган санъат арбоби Анвар Эргашев, барчамизнинг севимли актёримиз, Ўзбек Миллий академик драма театрига раҳбарлик қилиб, отахон театримиз ривожига катта ҳисса қўшган Ўзбекистонда хизмат кўрсатган артист Фатҳулла Масъудов, Бердақ номидаги Қорақалпоқ давлат академик мусиқали театрининг истеъдодли артисти Жанабай Утепбергенов, Сирдарё вилояти мусиқали драма театрининг маҳоратли актёри, Ўзбекистонда хизмат кўрсатган артист Адҳам Абдуллаев ва бошқа санъаткорларимизнинг номларини эҳтиром билан ёдга оламиз.

Ўз фаолиятининг маъно-мазмунини она халқимизга, жонажон Ватанимизга сидқидилдан хизмат қилишда деб билган бу фидойи юртдошларимиздан бой маънавий мерос қолди.

Уларнинг театр саҳналарида, бадиий ва телевизион фильмларда яратган ёрқин образлари, юртимиз ва жаҳон миқёсида эътироф этилган мусиқий асарлари абадият мулки бўлиб қолиши, шубҳасиз.

Ўзбекистон Маданият вазирлиги

Сирдарё вилояти мусиқали драма театри актёри, Ўзбекистонда хизмат кўрсатган артист Адҳам Абдуллаев 13 июль куни 67 ёшида оламдан ўтган. Унинг ўлими ҳақида ССВ 16 июль ахборот берганди.

Ўзбекистон халқ артисти Дилбар Икромова 25 август куни 73 ёшида ҳаётдан кўз юмганди. ССВ унинг ўлими коронавирус асоратлари оқибатида юзага келганини 26 август куни тасдиқлаган.

Ўзбек миллий академик драма театри директори, Ўзбекистонда хизмат кўрсатган артист Фатҳулла Масъудов 30 август куни 57 ёшида вафот этди. Унинг ўлими ҳақида ССВ 31 август куни хабар берди.

Бердақ номидаги Қорақалпоқ давлат академик мусиқали театрининг собиқ раҳбари Жанабай Утепбергенов 4 август куни, Ўзбекистонда хизмат кўрсатган санъат арбоби Анвар Эргашев 8 август куни вафот этган. Ушбу икки санъаткорнинг ўлимидан сўнг бир ойга яқин вақт ўтган бўлса-да, улар коронавирус қурбони бўлгани ҳақида ССВ шу вақтгача ахборот бермаган.

Жанабай Утепбергенов ва Анвар Эргашев билан бирга қўшиб ҳисоблаганда «Дарё» ҳисоби бўйича коронавирус қурбонлари сони 334 нафарга етди. Булардан 323 нафари COVID-19 асоратларидан вафот этганини Соғлиқни сақлаш вазирлиги тасдиқлаган.

ССВ томонидан коронавирус қурбони бўлгани «тан олинмаган» қолган тўққиз киши:

• ДХА Навоий вилояти бошқармаси ходими Адҳамжон Деҳқонов;
• Маданият вазирлиги ходими Акмал Ирисов;
• 9 ва 15 июль кунлари Олмалиқ шаҳар шифохоналарида вафот этган икки аёл;
• Чилонзор тумани СЭОМ бактериология лабораторияси мудири Марҳабо Аҳмедова;
• Бош прокурорнинг собиқ ўринбосари, Қорақалпоғистон прокуратурасида бўлим бошлиғи Ҳакимбай Халимов;
• Жиноят ишлари бўйича Тошкент вилоят суди судьяси Хайриддин Шермуҳамедов
• Самарқанд вилояти Тойлоқ тумани прокурори Фарҳод Абдухолиқов;
• Инновацион соғлиқни сақлаш миллий палатаси «Буюк келажак» кенгаши эксперти Санжар Жалолов.