Россияда коронавирусга қарши «Спутник V» вакцинасининг 3-босқич синови 2022 йил охирларига бориб якунлаш режалаштирилмоқда. «ТАСС»нинг хабар беришича, бу ҳақдаги тегишли маълумот мамлакат Соғлиқни сақлаш вазирлигининг дори воситалари давлат реестри сайтида жойлаштирилган.
Шундай қилиб, вакцина синови 27 ойдан ортиқ давом этади.
Вакцина ишлаб чиқарган Гамалея илмий-тадқиқот марказининг директори Александр Гинцбург бир неча кундан кейин Москвада синовларнинг 3-босқичи бошланишини, синовларда иштирок этаётган Москва клиникалари ушбу дорини 3—4 сентябрь кунлари қабул қилишини маълум қилган.
Хабарда айтилишича, тадқиқотга дастлаб ўнга яқин тиббиёт муассасалари жалб қилинади, кейинчалик улар сонини 20 тага етказиш режалаштирилган. Рўйхатдан ўтганлар орасидан кўнгиллиларни танлаш яна бир неча кун вақт талаб этилади. Улардан таҳлил олиниб, бошқа керакли текширувлар ўтказилади.
Эслатиб ўтамиз, Россиянинг Гамалея институти томонидан яратилган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади. Вакцина «Спутник V» деб номланди.
Аввалроқ вакцинани яратиш ва тадқиқ қилиш ишларини молиялаштирувчи Россиянинг тўғридан-тўғри инвестициялар жамғармаси раҳбари Кирилл Дмитриев Россияда коронавирусга қарши оммавий эмлаш 2020 йил октябрь ойидан бошланишини айтганди. Кейинчалик Россияда хавф гуруҳига кирувчи кишиларни коронавирусга қарши оммавий эмлаш 2020 йилнинг ноябрь—декабрь ойларида бошланиши ҳақида хабар берилди.
Изоҳ (0)